Studeanttastivrra jođiheaddji Elena Skum lohka ohcciidlogut čájehit ahte Sámi allaskuvla lea bivnnuhis oahppobáiki. Priváhta govva.

May 03. beaivi 2019

Sámi allaskuvla geasuha nuoraid

Sámi allaskuvlla ohcciidlogut ain lassánit. Obbalaš ohcciidlohku lea 32 proseanttain lassánan diimmá ektui seammá áiggi, 334 ohccis diimmážis 441 ohccái dán jahkái. Sámi allaskuvllas earenoamážit illudit go eambbo nuorat leat ohcan oahpuide.

Studeanttastivrra jođiheaddji Elena Skum lea movttet. Son vázzá sámi vuođđoskuvlaoahpaheaddjeoahpu 5.-10. ceahki mastergráda nuppi jagi. Su mielas lea hui gelddolaš go eambbo nuorat leat ohcan Sámi allaskuvlii.

- Dat gal lea hui somá ja čájeha ahte Sámi allaskuvla lea bivnnuhis oahppobáiki.

Skum mielas orru allaskuvlla sámegielfálaldat ja sámi biras ožžon buoret fuomášumi ja beroštumi.

- Dáppe besset sii geat leat sámegiela oahppame duođas dan oahppat. Seammás besset hupmat ja hárjehallat maiddái olggobealde skuvlla, go dáppe gullo sámegiella juohke sajis. Sii geat fas leat sámi guovlluin eret besset gazzat oahpu eatnigillii ja orrut sámi birrasis.

Elena lea duhtavaš go beassá eatnigillii gazzat oahpu.

- Mun háliidin dáppe vázzit skuvlla go de beasan eatnigiela hupmat ja seammás oaččun sámi perspektiivva oahpahusas.

Profilerejuvvon oahput bivnnuhat

Vuosttašvuoruheami ohccit leat maid lassánan veaháš diimmážis. Diibmá ledje 167 ohcci vuoruhan Sámi allaskuvlla oahpuid vuosttažin seammá áiggi, ja dán jagi fas leat 172 vuosttašvuoruheami. Bivnnuheamos oahput leat sámi vuođđoskuvlaoahpaheaddjeoahput, sámegiela álgokursa ja sámi journalistihka mastergráda álgoálbmotperspektiivvas.

Rektor Gunvor Guttorm lea hui duhtavaš go Sámi allaskuvla geasuha. Son čilge ahte oahput mat leat profilerejuvvon leat beaggán ja ohcciid geasuhan.

- Orru nu ahte dál ohcagohtet eambbo nuorat, geat easkkábále leat geargan joatkkaskuvllain. Mun lean duhtavaš go dan mađe ohccit leat dán jagi, dat čájeha ahte min oahput leat geasuheaddjit.

Váldde oktavuođa

Dán jagi galggai bachelorprográmmaide ja integrerejuvvon masteroahpuide ohcat oktasaš sisaváldima bokte. Oanehisáigge oahput ja masteroahput ges leat ohcan ládje báikkálaš sisaváldima bokte.

Sadjásaš oahppohoavda Biret Elle J. Eira muittuha ohcciid buot duođaštusaid sáddet áiggil.

- Dál lea dehálaš ahte ohccit doaimmahit duođaštusaid oktasaš sisaváldima dahje báikkálaš sisaváldima bokte.

Eira ávžžuha váldit oktavuođa oahppohálddahusain jus dárbbaša veahki. 

- Áinnas váldde oahppohálddahusain oktavuođa jus leat makkárge gažaldagat dahje dárbbašat bagadallama.

 

Oktavuođadieđut:

+47 78 44 84 00

studieadm@samiskhs.no

 

Oahppohálddahus

Sámi allaskuvla

Hánnoluohkká 45

N-9520 Guovdageaidnu