April 07. beaivi 2019

Nuvttá ávvokonsearta Niko Valkeapääin

Sámi allaskuvla bovde buot beassášmessostalliid nuvttá ávvokonsertii allaskuvlla 30-jagi ávvudeami olis. Boađe donge minguin ávvudit.

- Lea lunddolaš ahte Sámi allaskuvlla 30-ávvudeapmi čalmmustahttojuvvo Sámi beassášmárkaniin Guovdageainnus. Dáppe dat ovdamearkka dihte luohti gullogođii almmolaččat ja olbmot duostagohte sámi kultuvrra loktet almmolašvuhtii. Konsearta lea Sámi allaskuvlla ávvoskeaŋka beassášmárkaniidda, direktevra Johan Ailo Kalstad cealká. 

Sámi allaskuvla deavdá dán jagi 30 jagi. Dan oktavuođas lágiduvvojit iešguđet doalut ja nuvttá beassáškonsearta leage vuosttaš ávvodoallu. Giđđat, čakčat ja skábman boahtit bovdet olbmuid sihke fágalaš lágidemiide ja guoimmuhemiide. Ávžžuhit olbmuid čuovvut mielde min ruovttusiidduin ja min sosiála mediakanálain vai dihtet minguin ávvudit. 

Niko Valkeapää almmuha fargga iežas 7. almmuhusa mas lea namma ”Gáldu”. Konsearttas ovdanbuktá sihke ođđa ja boares lávlagiid. 

Son lea ovdal vuoitán Sámi Grand Prix ja vuittii maiddái Spellemannsbálkašumi rabas luohkás jagi 2003. Čáppa mielat, vuogas šuoŋat, luohti ja poesiija lea dovddalmas beaktilvuođat artisttas, nannosit vuođđuduvvon sámi kultuvrras ja musihkkaárbevierus. 

– Musihkka lea bálggis illui, jeđđemii, jurdagiidda ja ráfái, dadjá Valkeapää.

Niko Valkeaää čuojaha skilleduorastaga 18.4.2019 diibmu 21 Diehtosiiddas. Konsearta lea áibbas nuvttá buohkaide. Diehtosiiddas bohtet maid leat eará lágideamit beassážiid oktavuođas. Čuovu mielde min ruovttusiiddus, dohko ilbmet dieđut dađi mielde.

Loga eambbo sámi beassášmárkaniid birra dáppe.