May 20. beaivi 2014

Allaskuvlla dutkit ja studeanttat Hawaiijas

Álgoálbmogiid dutkan- ja oahpahusmáilmmi dehálaš dáhpáhusat lágiduvvojit daid vahkuid Honolulus Hawaiijas. Sajis leat sihke Sámi allaskuvlla studeanttat, dutkit, oahpaheaddjit ja hálddahuslaš jođiheaddji.
Máilmmi álgoáálbmot alitoahpu organisašuvdna WINHEC doallá jahkečoahkkima miessemánu 15.-17.  beaivvi ja Máilmmi álgoálbmot oahpahuskonfereansa WIPCE dollojuvvo  19.-24. beaivvi.

WINHEC jahkečoahkkimii oassálastet Jan Henry Keskitalo, direktora Maaren Palisma ja lohkanguovddáža jođiheaddji Lisa Baal. Fárus lea maid journalistaoahpu kooridináhttor Torkel Rasmussen ja studeanttat Inger-Elle Suoninen, Elle-Maarit Arttijeff ja Risten Hætta.

Jahkečoahkkimis vállje WINHEC stivrra, gieđahallet ohcamušaid oahppoásahusaid geat leat ohcan dohkkeheami álgoálbmotásahussan ja mearridit WINHEC boahtte áiggi strategiijaid. WINHEC álggahuvvui 2002 ja Sámi allaskuvllas leamaš dehálaš rolla organisašuvnna ovddideamis. Earret eará lea Jan Henry Keskitalo leamaš stivrras álggu rájes ja Sámi allaskuvla lea váldán badjelasas hálddašit WINHEC dieđalaš áigečállaga.

Máilmmi álgoálbmot oahpahuskonfereansa – WICPE - dáidá leat ges máilmmi stuorámus álgoálbmot dutkankonfereansa. Lágideaddjit vurdet dán jagi 3000 oasseválddi.  Sámi allaskuvllas oassálastet girjjálašvuođa professor Vuokko Hirvonen,  duoji professor Gunvor Guttorm, pedagogihka 1. amanueansa Ylva Jannok Nutti ja allaskuvlla lektor Elisabeth Utsi Gaup.

Sámi allaskuvlla dutkiin lea konfereanssas iežaset bargobádji. – Min bargobádji lea okta oassi prográmmas mas mii muitalit sámi oahpahusa ja min dutkamušaid birra. Konfereansa lea dieđuid lonohallanbáiki, mas mii oažžut muitalit iežamet bargguid birra ja oahpásnuvvat oažžut eanet dieđuid eará eamiálbmogiid birra, muitala sámi girjjálašvuođa professor Vuokko Hirvonen NRK:i.