Sámi allaskuvlla 25 jagi ávvojahki
Ávvut minguin!
Sámi alitoahpu 25 jagi ja sámi dutkama 40 jagi
Sámi allaskuvla ávvuda 25 jagi 2014 čavčča. Almmolaš ávvodoalut leat Diehtosiiddas borgemánu 20.beaivve.
Sámi servodaga dárbu iežas dutkan- ja alitoahppoásahussii lea váikkuhan Sámi allaskuvlla ovdáneapmái. Allaskuvla ásahuvvui Guovdageidnui skábmamánu 1.beaivve 1989. Ulbmil lei gokčat sámi servodaga oahppodárbbuid. Allaskuvlla duktan nannejuvvui 2005:s go Davviriikalaš Sámi Instituhtta laktojuvvui Sámi allaskuvlii. Sámi Instituhtta ceggejuvvui Guovdageidnui 1974:s. Davviriikkaid sámi kulturpolitihkalaš doaimmat ledje Instituhta ceggema duogážis. Min ásahusa dutkamis lea nappo 40 jagi historjá.
25 jagi guhkes oahppoárbevierru láhčá oadjebas oahppodili Sámi allaskuvlla dálá ja boahttevaš studeanttaide. Máŋgga logijagi dutkanárbevierru nanne min oahpahusa.
Sámi Instituhta ja Sámi allaskuvlla ávvogirjjiid gávnnat dás vuollelis:
Sámi allaskuvlla 10-jagi ávvogirji “10 jagi gielain ja mielain/ 10 år for samisk høgere utdanning”
Sámi Instituhta 30-jagi ávvogirji “Sámi Instituhtta – 30 jagi/ Nordisk Samisk Institutt – 30 år”(Nordic Sámi Institute – 30 years) (2005)
Allaskuvlla ávvodoalut leat ođđa oahppojagi 2014-2015 álggahanvahkus 18.-22.8.2014. Ávvoseminára ja ođđa akademalaš jagi rahpan leat borgemánu 20.beaivve dii.12:00-15:00 Diehtosiiddas (gaskaboddosaš prográmma lea dás).
Bures boahtin Sámi allaskuvlii!
Jelena Porsanger, rektor