SER 104 - Árbevirolaš sámi ealáhusdoaimmat odne

Oahppu oahpista dasa movt leat sámi birgenlágit odne mat leat ovdalaš ealáhuslágiid joatkkan dehe juo ođđa doaimmat vuođđuduvvon daidda. 

• Oahpahus- ja eksámengiella: Oahpahus- ja eksámengiella lea davvisámegiella. Muhtun logaldallan sáhttá davviriikkalaš gielaide dehe eŋgelasgillii. Oahpahus eŋgelasgillii ii dulkojuvvo. Eará gielaid oahpahus dulkojuvvo dárbbu mielde.   
• Oahppočuoggá: 10 
• Oahppoáigi: Ovtta lohkanbaji badjel
• Oahpahan- ja oahppanvuogit: Oahpahus lágiduvvo logaldallamin, ekskuršuvdnan, individuála bargun, bagadallansemináran ja čuovvovaš studeantaovdanbuktimin/-ságastallamin. Dollo(jit) oahpahusdeaivvadeapmi/-deamit Sámi allaskuvllas ja oassi lea neahttaoahpahus. Dasa lassin lea ekskuršuvdna. Vurdojuvvo ahte studeanttat servet aktiivvalaččat deaivvademiide ja neahttaoahpahussii.

• Oahpu lágideapmi: Oassi oahpahusas lágiduvvo fysalaččat Sámi allaskuvllas ja oassi neahttaoahpahussan.

  
  Diibmoplána ja deaivvadanplána: TimeEdit 

  Ohcanwebas: "4022 Árbevirolaš sámi ealáhusdoaimmat odne (bachelornivå)10sp"

Sisabeassangáibádusat: 

• Dábálaš sisabeassangáibádusat alitohppui. Sisabeassanvuođđu sáhttá leat juogo oppalaš lohkangelbbolašvuohta (čađahan joatkkaskuvlla/logahaga/gymnása) dahje reálagelbbolašvuohta. Oppalaš lohkangelbbolašvuođa gáibádusat olgoriikkaohcciide bohtet ovdan GSU-listtus. 
• Davvisámegielmáhttu.

Sámegiela gáibádusa sáhttá deavdit čuovvovaš vugiid mielde: Norgga joatkkaskuvllas sámegiella 1. dahje 2. giellan 2, Suoma logahagas eatnigielladutkkus dahje lohkan sámegiela vierrogiellan ja Ruoŧa gymnásas eatnigiellan (modersmål 200 čuoggá) dahje ođđaáigásaš giellan (moderna språk 200–300 čuoggá) dahje vástideaddji sámegieloahppu doaibmi njuolggadusaid mielde. 

Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin dahje ceavzit giellageahččaleami maid Sámi allaskuvla lágida. Jus lea eahpesihkarvuohta man dási gelbbolašvuohta ohccis lea, de ášši ovddiduvvo fágalaš árvvoštallamii ja meannuduvvo dán vuođul.

Oahpu sisdoallu:

Oahppu fátmmasta servodatrievdama ja ealáhuspolitihkalaš proseassaid ja nuppe bealde fas čalmmustahttá konkrehtalaš ovdamearkkaid bokte dasa makkár ealáhus- ja birgenlágidoaimmaid vuogit ja dilit leat odne.

Gáibádusat beassat eksámenii 

Ovdal beassá eksámenii, studeanta galgá: 
Čađahan ja ožžon ovtta individuála bargogáibádusa dohkkehuvvot, mii lea oanehis čálalaš bargu, unnimusat 3 siiddu. 

Searvan bagadallanseminárii mas ovdanbuktá iežas válljejuvvon fáttá eksámenčállosii

Eksámen 

5 beaivvi čálalaš ruovttueksámen mas studeanta vállje fáttá oahpu sisdoalu vuođul maid oahpaheaddji dohkkeha. Vástádusa guhkkodat galgá leat 6-8 siiddu.

Eksámenbargu árvvoštallojuvvo ECTS-vuogádaga árvosániid mielde, mas buoremus árvosátni lea A ja vuolimus ceavzinárvosátni lea E. F-árvosátni mearkkaša ahte ii leat ceavzán. 

Oahppoplána 

Jus leat jearaldagat mat gusket oahpposaji ohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain e-boastta bokte: oahppohalddahus@samas.no