SÁM 216 Giellagáhtten 2
- Oahpu lágideapmi: Oahpahus lágiduvvo neahttaoahpahussán.
- Oahpahusgiella: Davvisámegiella. Studeanta ferte maiddái máhttit lohkat eaŋgalasgielat fágagirjjálašvuođa.
- Oahppokoda: SÁM 216
- 10 oahppočuoggá
Oahppoplána ja lohkanmearri- Diibmoplána ja deaivvadanplána:
Oahpu sisdoallu
Kurssas studeanta čiekŋuda iežas dieđuid giellagáhttemis ja gielladikšumis, ja hárjána teavsttaid árvvoštallamii ja divvumii viiddis geahččanguovllus. Ovttaskas giellameattáhusaid lassin studeanta hárjána geahččat giela čielggasvuođa, njuovžilvuođa ja riggodaga oppalaččat, ja oahppá buoridit giela maiddái teakstaráhkadusa ja sátneráju dásiin. Áššeteavsttaid guovddáš iešvuođat guorahallojuvvojit gielladikšuma oainnus.
Stuorra deaddu kurssas lea geavatlaš hárjehusain, mat hárjehit ja ráhkkanahttet studeantta giellagáhttenbargguide áššedovdi dásis.
Kurssa ulbmilin lea oažžut čiekŋalis áddejumi sámegiela giellagáhttema hástalusain, ja hárjánišgoahtit gielladivvunbargguide áššedovdi dásis. Studeanta viiddida máhtuidis ovttaskas giellameattáhusaid divvumis teavsttaid giela oppalaš buorideapmái. Son oahppá árvvoštallat teavsttaid giela riektačállima, sojaheami, cealkkaráhkadusaid, teakstaráhkadusa, sátneráju ja suopmanduogáža geahččanguovllus, ja dan vuođul buoridit ja njuovžžálmahttit teavstta ollislaččat ja áššeteavsttaid guovddáš iešvuođaid. Son oahppá maiddái atnit ávkin giellaoahpaid, sátnegirjjiid ja digitála giellareaidduid giellagáhttenbarggus.
Oahppoprográmma gullevašvuohta
Oahppu gullá Sámegiela ja sámi girjjálašvuođa bachelorprográmma giellasuorggi čiekŋudanfágaide.
Oahpahusgiella
Davvisámegiella. Studeanta ferte maiddái máhttit lohkat eaŋgalasgielat fágagirjjálašvuođa.
Oahpahan - ja oahppanvuogit
Oahpahusvuohkin sáhttet adnot logaldallamat, hárjehusat, joavkobarggut ja bagadallamat. Studeanttat barget maiddái iehčanasat lohkanmeriin ja geatnegahtton bargguiguin.
Gáibadusat beassat eksámenii
Gursii gullet njeallje geatnegahtton barggu, mat dollet sisttiset máŋggabealat giellagáhtten- ja gielladivvunhárjehusaid. Geatnegahtton barggut galget buktojuvvot sisa čálalaš hámis. Fágaoahpaheaddji mearrida bargguid dárkilut sisdoalu ja hámi, ja maiddái sisabuktima áigemeriid.
Eksámen
Eksámenvuohkin lea 7-beaivásaš ruovttueksámen. Studeanta galgá iehčanasat bargat eksámengažaldagaiguin ja atnit ávkin buot gálduid ja veahkkeneavvuid maid ieš háliida. Studeanttas lea čieža beaivvi áigi buktit sisa eksámenvástádusaid čálalaš hámis.
Eksámen árvvoštallojuvvo bustávvaárvosániiguin A–F.
Sisabeassangáibádusat
- Dábálaš sisabeassangáibádusat alitoahpahussii. Sisabeassanvuođđu sáhttá leat juogo oppalaš lohkangelbbolašvuohta (čađahan joatkkaskuvlla/logahaga) dahje realagelbbolašvuohta. Oppalaš lohkangelbbolašvuođa gáibádusat olgoriikka ohcciide bohtet ovdan NOKUTa GSU-listtus.
- Sámegielmáhttu.
- Dasa lassin galgá ohcci čađahan SÁM 110 Sámegiela njálmmálaš ja čálalaš giellan (10 oč) dahje vástideaddji oahppu.
Sámegiela gáibádusa sáhttá deavdit čuovvovaš vugiid mielde: Norgga joatkkaskuvllas sámegiella 1. dahje 2. giellan, Suoma logahagas eatnigielladutkkus dahje lohkan sámegiela vierrogiellan ja Ruoŧa gymnásas eatnigiellan (modersmål 200 čuoggá) dahje ođđaáigásaš giellan (moderna språk 200-300 čuoggá) dahje vástideaddji sámegieloahppu doaibmi njuolggadusaid mielde. Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin dahje ceavzit giellageahččaleami maid Sámi allaskuvla lágida. Jus lea eahpesihkarvuohta man dási gelbbolašvuohta ohccis lea, de ášši ovddiduvvo fágalaš árvvoštallamii ja meannuduvvo dán vuođul.
Koordinator
