SÁM-0104 Davvisámegiela álgokurssa 2. oassi
Sámi allaskuvla fállá sámegiela álgooahpu álggahalliide, geat eai máhte hupmat eaige čállit sámegiela. Álgooahppu sáhttá maid heivet sidjiide, geat leat gullan sámegiela, muhto eai huma.
Oahpahus- ja eksámengiella: Oahpahusgielat leat dárogiella ja davvisámegiella. Sámegiela geavaheapmi deattuhuvvo dađistaga oahpu mannolagas.
Oahpahusbáiki: “Barentshuset”, UiT visti, Girkonjárga
Oahppočuoggá: 15 oahppočuoggá
Oahppoáigi: 1 lohkanbaji
Oahpu lágideapmi: Oahpus leat 2,5 vahku fysalaš beaivečoagganeami, ja muđui eahketoahpahus. Oahpahusa ii leat vejolaš čuovvut neahta bokte.
Diibmoplána ja deaivvadanplána
- Oahpahan- ja oahppanvuogit:
Studeanttaid aktiivvalaš searvan njálmmálaš hárjehallamiidda, joavkobargguide ja bagadallamii lea
eaktun dasa ahte oahpahus ja oahppan lihkostuvvá.
Fágaoahpaheaddji lágida oahppandiliid dan láhkái ahte studeanttat besset oadjebas birrasis
hárjehallat giela. Oahpahus fállojuvvo fysalaš beaivečoagganemiid ja eahketoahpahusa bokte. Dasa
lassin leat muhtun diimmut neahttaoahpahussan. Muhtin eahketoahpahusdiimmuid lágida
fágaoahpaheaddji neahta bokte, muhto studeanttat čuvvot oahpahusa luohkkálanjas ovttas báikki
oahpaheddjiin/giellavehkiin.
Mielstudeanttat ja movttiidahtti biras ja oahppanresurssat konkretiserenávdnasiiguin doibmet
gielalaš buvttadeapmái doarjjan.
Sámegielagat ja earenoamážit árbečeahpit, geat bivdojit searvat vissis temáid olis, dorjot
studeanttaid háhkat gulahallangelbbolašvuođa.
Studeanta duođašta iežas oahppama bargomáhpa bokte. Studeanta dokumentere gielalaš
buvttadeami temáid oktavuođas omd. govvateavsttaiguin ja dialogaiguin.
Oahpu čađaheami oktavuođas fállo bagadallan. Vuođđun bagadallamii lea studeanta
reflekšuvdnalogga ja bargomáhppa.
- Sisabeassangáibádusat
Ohccis galgá leat sámegiela máhttu mii vástida SÁM-0103 Davvisámegiela álgokurssa 1. oassi (15 oč) oahpu dahje SAAL 1 Sámegiella praktihkalaš dilis – Álgooahppu 1. oassi (15 oč) oahpu oahppanjoksosiid. Oahppu lea álggahalliide, geat eai máhte hupmat eaige čállit sámegiela.
Forskrift om opptak til høyere utdanning vuođul álgokurssaide ja lohkanbadjeohppui ii gáibiduvvo oppalaš lohkangelbbolašvuohta jus ohccis lea sámi gullevašvuohta daid njuolggadusaid vuođul maid ásahus lea mearridan. Mearrádus guoská sidjiide geain lea sámi gullevašvuohta čuovvovaš čuoggáid vuođul
- Sápmelaš gii lea massán giela, ja gii háliida oahppat sámegiela, dahje
- Bargi almmolaš ásahusas sámegielat guovllus gii háliida oahppat sámegiela, dahje
- Eará (omd. ohcci orru sámi bearrašis dahje sámi guovllus ja háliida oahppat sámegiela)
Oahpus leat 15 oahpposaji. Ohcciid vuoruheapmi dahkko Sámi allaskuvlla sisaváldinnjuolggadusaid § 5-4 (2) vuođul ja oahpposajit vuoruhuvvojit čuovvovaččat:
- Sápmelaččat geat leat massán giela, ja geat háliidit oahppat sámegiela
- Bargit almmolaš ásahusain sámegielat guovlluin geat háliidit oahppat sámegiela
- Earát (omd. ohccit geat orrot sámi bearrašis dahje sámi guovllus ja háliidit oahppat sámegiela)
Ohccit galget čállit motivašuvdnareivve mas čilgejit guđe čuoggá vuođul ohcet oahpposaji.
- Oahpu sisdoallu:
Gulahallanbiras láhččojuvvo earret eará geavatlaš doaimmaide. Studeanttat sámástit gaskaneaset ja oahpaheddjiiguin barggadettiin. Guovddáš oahppotemát čatnasit sámi árbevieruide, birgejumiide ja duovdagiidda. Temáid láidestanbajilčállagat leat: Lagašbiras
- ieš ja bearaš
- báikedoallu ja huksehusat
- bivut - servvoštallan ja bálvalusdilálašvuođat
Birgen
- áigedoahpagat (diibmu, jándor, mánut, jahkeáigodagat)
- dálki, johtin ja dádjadeapmi
- luonddunamahusat ja báikenamat
Servodatlaš dilálašvuođat
- dáidda, duodji, girjjálašvuohta, osku ja musihkka
- sámegielat ásahusat
- media ja eará gulahallangaskaoamit
Njálmmálaš gulahallamis giehtalagaid geavatlaš doaimmaiguin iešguđet birrasiin hábmejuvvojit álkis cealkagat. Dalle hárjehallat sátneluohkáid sojahanminstariid ja dássemolsašumiid ja guoskkahit dábáleamos suorggidemiid.
- Gáibádusat beassat eksámenii
- Studeanta lea geatnegahtton čuovvut 80 % oahpahusas.
- Rollaspeallu (eanemustá 3 studeantta) ráhkadeapmái ja njálmmálaš ovdanbuktimii searvan (sullii 10 minuhta). Sámegiela geavaheapmi bargoproseassa vuolde deattuhuvvo. Rollaspeallu sáhttá leat fearán, muitalus dahje máinnas dialogahámis.
- Oanehis njálmmálaš ovdanbuktin (sullii 5 minuhta) fáttás maid ieš lea válljen.
- Reflekšuvdnaloggat mas árvvoštallá iežas gielalaš ovdáneami (unnimustá 3 logga ja juohke logga galgá leat sullii ½ siiddu)
- Prošeaktabargui (eanemustá 3 studeantta) ja njálmmálaš ovdanbuktimii searvan (sullii 10 minuhta). Sámegiela geavaheapmi bargoproseassa vuolde deattuhuvvo. Prošeakta galgá vuođđuduvvot dasa mii lea relevánta oahpu sisdoalu ja máhtolašvuođa ektui.
- Teaksta (1 siidu) mas čájeha gielalaš máhtu ja ahte máhttá hábmet álkis cealkagiid. Prošeaktabarggu temá addá jođu čállit teavstta.
Ovdal eksámendilálašvuođa vállje studeanta bargomáhpas osiid čájehanmáhppii
- 1 rollaspeallu dahje iežas njálmmálaš ovdanbuktima
- 1 reflekšuvdnalogga
- 1 temábargu
- 1 teaksta prošeaktabarggu vuođul
Barggut galget sisabuktojuvvot šihttojuvvon áigemearrái ja dohkkehuvvot fágaoahpaheaddjis.
- Eksámen
Oktagaslaš njálmmálaš eksámen čájehanmáhpa vuođul mii bistá sullii 15 minuhta. Árvvoštallamis deattuhuvvo njálmmálaš giellageavaheapmi. Eksámen árvvoštallo ceavzán dahje ii ceavzán.
Jus leat jearaldagat mat gusket oahpposaji ohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain e-boastta bokte: oahppohalddahus@samas.no
