OKT 305 Akademalaš čállinseminára

Oahpu geavatlaš ulbmilin lea doarjut studeantta masterbarggu čállima. 

• Oahpahus- ja eksámengiella: Váldooahpahusgiellan lea davvisámegiella. Eksámengiellan lea davvisámegiella dahje eará sámegiella.  
• Oahppočuoggá: 10 
• Oahppoáigi: Guovtti lohkanbaji badjel: vuosttaš ja goalmmát
• Oahpahan- ja oahppanvuogit: Logaldallamat, ruovttubarggut, joavkobarggut ja seminárat. Seminárain studeanttat buktet ovdan iežaset bargguid ja kommenterejit eará studeanttaid ovdanbuktimiid. 
• Oahpu lágideapmi: Oassi oahpahusas lágiduvvo fysalaš deaivvadeapmin Guovdageainnus, ja oassi neahttaoahpahussan. Fysalaš deaivvademiide ii sáhte searvat neahta bokte.
•  
• Diibmoplána ja deaivvadanplána: TimeEdit 
•  
• Ohcanwebas: "2508 OKT 305 Akademalaš čállinseminára (Master) 10sp" 
   

Sisabeassangáibádusat: 

• Sámegiela ja sámi girjjálašvuođa bachelorgráda eatnigiel dásis dahje vástideaddji oahppu.
• Gáibiduvvo ahte ohccis leat 90 oahppočuoggá čiekŋudanoahput sámegielas eatnigiellan. 
• Bachelorgráda gaskamearálaš árvosátni galgá leat C dahje buoret. Studeanttain geain lea cand.mag.-dutkkus, galgá leat sámegielas gaskamearálaš árvosátnin 2,7 dahje buoret. 

Oahpu sisdoallu: 

Oahppu čiekŋuda ja viiddida studeantta máhtuid dieđalaš ja fágalaš čállimis, ja ráhkkanahttá su masterbarggu čállimii. Oahpus leat njeallje váldosisdoalu: 

1) dieđalaš teakstašlájat ja teakstaráhkadusat 

2) dieđalaš ákkastallanvuogit, giellageavahus ja stiila 

3) dieđalaš čállosa formála iešvuođat 

4) dieđalaš publiserenvuogádagat 

Studeanta čiekŋuda dáidda fáttáide sihke teorehtalaččat ja praktihkalaččat. Son oažžu máŋggabealat vásáhusaid dieđalaš čállimis: son omd. pláne teavstta ráhkadeami ja dan čállima, hábme ja buorida iežas teavstta, ja oahppá geavahit gálduid, govaid, govvosiid ja tabeallaid rivttes láhkai.

Gáibádusat beassat eksámenii

Čuovvovaš gáibádusat leat eaktun beassat eksámenii: 

1) Vuosttaš lohkanbajis studeanta čállá preliminára dutkanplána iežas masterbarggu várás (dahje eará sullalas dieđalaš barggu várás). Dutkanplána galgá doallat sisttis čilgehusa barggu fáttás ja dutkančuolmmain, guovddáš metodaid, ja jurddašuvvon áigeplána. Plána guhkkodat galgá leat 5–6 siiddu. (Dutkanplána galgá ovdanbuktit masterbargosemináras oassin SÁM 321 Masterbargu -oahpus, geahča SÁM 321 - oahppoplánas.) 

2) Čálalaš 2-4 siiddu hárjehusbargu, mii guoská dieđalaš čállima formála iešvuođaide (omd. govvosat, govat, tabeallat, gálduid geavaheapmi, teavstta hábmen). 3) Čállit árvvoštallama dahje kritihkalaš referáhta muhtun guovddáš gáldus dahje gálduin, maid studeanta áigu geavahit masterbarggus (dahje eará barggus, man várás dutkanplána lea čállojuvvon). Čállosa guhkkodat galgá leat 5–6 siiddu.

4) Ovdanbuktit árvvoštallama dahje kritihkalaš referáhta (3. geatnegahtton barggu) sisdoalu njálmmálaččat semináras (15 minuhta ovdanbuktin + 5 minuhta kommeanttaid ja ságastallama várás). 

5) Opponeret ovtta semináraovdanbuktima. 

Buot geatnegahtton barggut galget leat dohkkehuvvon ovdal eksámena.

Eksámen

Eksámenmáhppa mas leat golbma geatnegahtton čálalaš barggu (geahča 9. čuoggás). Studeanttas lea vejolašvuohta divvut bargguid máhcahagaid vuođul ovdal buktá eksámenmáhpa árvvoštallamii. 

Árvvoštallan: Ceavzán / ii ceavzán

Oahppoplána 

Jus leat jearaldagat mat gusket oahpposaji ohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain e-boastta bokte: oahppohalddahus@samas.no