OKT 304 Sámegiela ja sámi girjjálašvuođa dutkanhistorjá

Oahpus oahpásnuvvat sámegiela ja sámi girjjálašvuođadutkama historjái, 1600-logu rájes dálá áigái. 

• Oahpahus- ja eksámengiella: Váldooahpahusgiellan lea davvisámegiella. Eksámengiellan lea davvisámegiella dahje eará sámegiella.  
• Oahppočuoggá: 10 
• Oahppoáigi: Ovtta lohkanbaji badjel
• Oahpahan- ja oahppanvuogit: Logaldallamat, seminárat ja iehčanas čállinbargu. 

• Oahpu lágideapmi: Oahpahus lágiduvvo neahttaoahpahussan.

  Diibmoplána ja deaivvadanplána: TimeEdit

  Ohcanwebas válljet: "2504 OKT 304 Sámegiela ja sámi girjjálašvuođa dutkanhistorjá (Masternivå) 10sp"

Sisabeassangáibádusat

• Sámegiela ja sámi girjjálašvuođa bachelorgráda eatnigiel dásis dahje vástideaddji oahppu.
• Gáibiduvvo ahte ohccis leat 90 oahppočuoggá čiekŋudanoahput sámegielas eatnigiellan. 
• Bachelorgráda gaskamearálaš árvosátni galgá leat C dahje buoret. Studeanttain geain lea cand.mag.-dutkkus, galgá leat sámegielas gaskamearálaš árvosátnin 2,7 dahje buoret. 

Oahpu sisdoallu: 

Oahpus guorahallat sámegiela ja sámi girjjálašvuođa guovddáš dutkansurggiid ja dain geavahuvvon metodaid ja materiálaid. Oahpus čiekŋut dálá dutkamii čálalaš ja njálmmálaš bargguid vehkiin.

Gáibádusat beassat eksámenii

Čuovvovaš gáibádusat leat eaktun beassat eksámenii:

•  Čađahit guokte (2) njálmmálaš ovdanbuktima: 4 
  •  Studeanta vállje ovttasráđiid fágaoahpaheddjiiguin sámegiela ja sámi girjjálašvuođa doavtterbargguid dahje eará dutkančállosiid (dieđalaš artihkkaliid ja monografiijaid), maidda oahpásmuvvá ja maid guovddáš sisdoalu son buktá ovdan seminárain. Lohkamušaid siidolohku galgá leat oktiibuot 200–500 siiddu. 
  • Ovdanbuktimiid guhkkodat lea 30 minuhta.
•  Guokte (2) njálmmálaš opponerenbarggu:
  •  Studeanta galgá kommenteret unnimustá guokte eará studeanttaid semináraovdanbuktima. 
•  Guokte (2) čálalaš barggu: 
  •  Studeanta galgá čállit guokte čálalaš barggu, main nubbi guorahallá gielladutkama ja nubbi gis girjjálašvuođadutkama historjjá. Bargguid dárkilit fáttát sohppojuvvojit ovttas fágaoahpaheddjiiguin. Goappáge barggu guhkkodat galgá leat unnimusat 5 siiddu.

 Barggut galget leat dohkkehuvvon ovdal eksámena.

Eksámen

Eksámen lea 5-beaivásaš ruovttueksámen mas studeanta bargá viidásat nuppiin geatnegahtton čálalaš bargguin, juogo gielladiehtaga dahje girjjálašvuođadiehtaga historjjá suorggis (gč. 9. Gáibádusat beassat eksámenii). Siidolohku 10–15 siiddu. 

Eksámenbargu árvvoštallojuvvo ECTS-vuogádaga árvosániid mielde, mas buoremus árvosátni lea A ja vuolimus ceavzinárvosátni lea E. F-árvosátni mearkkaša ahte ii leat ceavzán

Oahppoplána 

Jus leat jearaldagat mat gusket oahpposaji ohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain e-boastta bokte: oahppohalddahus@samas.no