DUO-1015 Plánen, hutkáivuohta ja duddjon

Oahpus vuojulduvvat dasa, mo plánet, duddjot ja gaskkustit duoji.

• Oahpahus- ja eksámengiella: Váldo oahpahusgiella lea davvisámegiella. Jus oassi logaldallamiin lea eará sámegielaide, dáro- dahje ruoŧagillii, de dat dulkojuvvo dárbbu mielde. Jus logaldallamat leat eaŋgalasgillii, dat eai dulkojuvvo. Eará sámegielat studeanttaide geahččalit láhčit dili nu ahte sii sáhttet čállit bargguid ja oažžut oasi bagadallamis iežaset sámegillii.
• Oahppočuoggá: 10 
• Oahppoáigi: Ovtta lohkanbaji badjel
• Oahpahan- ja oahppanvuogit: Bargobájit, logaldallamat, lohkanmeari lohkan, hárjehusat ja bagadallamat.

• Oahpu lágideapmi: Neahttadoarjjaoahpahus: Oahpus leat sihke fysalaš deaivvadeamit Sámi allaskuvllas ja neahttaoahpahus. Logaldallamiidda lea vejolaš oassálastit neahta bokte, muhto hárjehusat ja bargobájit gáibidit fysalaš searvama.
    
  Diibmoplána ja deaivvadanplána TimeEdit 

  Ohcanwebas: "5123 Plánen, hutkáivuohta ja duddjon (Bachelornivå)10sp"

Sisabeassangáibádusat: 

• Dábálaš sisabeassangáibádusat alitohppui. Sisabeassanvuođđu sáhttá leat juogo oppalaš lohkangelbbolašvuohta (čađahan joatkkaskuvlla/logahaga/gymnása) dahje reálagelbbolašvuohta. Oppalaš lohkangelbbolašvuođa gáibádusat olgoriikkaohcciide bohtet ovdan GSU-listtus. Go oahppu lágiduvvo sámegillii, de olgoriikkaohcciide ii gusto dárogielagáibádus, vrd. Forskrift om opptak til høgare utdanning § 2-2 (6).
• Sámegielmáhttu.
• Duodje-, dáidda- dahje hábmengelbbolašvuohta 

Sámegiela gáibádusa sáhttá deavdit čuovvovaš vugiid mielde: Norgga joatkkaskuvllas sámegiella 1. dahje 2. giellan 2, Suoma logahagas eatnigielladutkkus dahje lohkan sámegiela vierrogiellan ja Ruoŧa gymnásas eatnigiellan (modersmål 200 čuoggá) dahje ođđaáigásaš giellan (moderna språk 200-300 čuoggá) dahje vástideaddji sámegieloahppu doaibmi njuolggadusaid mielde. Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin dahje ceavzit giellageahččaleami maid Sámi allaskuvla lágida. 

Duodje-, dáidda- dahje hábmengelbbolašvuođa gáibádusa sáhttá duođaštit čuovvovaš vugiid mielde: Norgga joatkkaskuvllas čađahan duodje-, dáidda- dahje hábmenoahpu, Suomas duodje-, dáidda- dahje hábmensuorggi artesánaoahpu, Ruoŧa gymnásas čađahan estehtalaš- dahje sámeprográmma. Duodje-, dáidda- dahje hábmengelbbolašvuođa sáhttá maiddái deavdit jus lea maŋŋel joatkkaskuvlla čađahan unnimusat jagi duodje-, dáidda- dahje hábmensuorggi oahpu ámmátskuvllas dahje fágaskuvllas, dahje universitehta- ja allaskuvladásis čađahan unnimusat 15 oahppočuoggá duodje-, dáidda- dahje hábmensuorggi oahpu. 

Jus ohccis ii leat formála gelbbolašvuohta fágasuorggis, de sáhttá ohcci maiddái duođaštit duodje-, dáidda- dahje hábmenfágalaš gelbbolašvuođa iežas bargguid bokte. Dasto galgá juogo sáddet sisa ja oažžut dohkkehuvvot: 

• Govat mat čájehit unnimusat vihtta duoji, dahje 
• 2-3 duodje-, hábmen dahje dáiddalaš prošeavtta, mat čujuhit kreatiivvalaš proseassaide, ovdamearkka dihtii portfolio 

Dárbbu mielde ovddiduvvo gelbbolašvuođa meroštallan fágalaš árvvoštallamii ja meannuduvvo dán vuođul. Sáhttá nai čađahuvvot ságastallan duodjegelbbolašvuođa árvvoštallama doarjjan 

Oahpu sisdoallu: 

Oahppu fállá praktihkalaš ja teorehtalaš dieđu, mainna studeanta ovddida iežas hutkáivuođa ja viiddida iežas duodječehppodaga ja áddejumi. Oahpus ávkkástallat čuolmmaidčoavdinmetodaiguin, mat fállet studentii reaidduid plánemii, hábmemii ja duddjomii. Oahpus suokkardallat hutkáivuođa duddjonproseassas. Studeanta sáhttá iežas beroštumi mielde válljet dipma- dahje garraduoji suorggi. 

Gáibádusat beassat eksámenii  

Ovdal beassá eksámenii, galgá studeanta: 

 - Dahkat guokte geatnegahtton barggu ja portfolio mas leat čuovvovaš barggut:  

1. Praktihkalaš joavkobargu  

2. Okta oktagaslaš duodji  

Fágaoahpaheaddji dohkkeha gáibádusaid beassat eksámenii. 

Eksámen  

Eksámen lea guovtti oasis: 

1. Portfolioeksámen gos joavku ovdanbuktá joavkobarggu ja duoji maid leat buvttadan. Deaddu lea 80 % loahpalaš árvosánis.  

2. Njálmmálaš eksámenseminára gos studeanta ovdanbuktá bargguidis. Deaddu lea 20 % loahpalaš árvosánis.  

Árvosánit addojuvvojit ECTS vuogádaga mielde, mas A lea buoremus árvosátni ja E lea vuolemus ceavzinárvosátni. F árvosátni mearkkaša ahte ii leat ceavzán. 

Oahppoplána 

Jus leat jearaldagat mat gusket oahpposaji ohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain e-boastta bokte: oahppohalddahus@samas.no