VSÁM-6104 Sámegiela variašuvdna ja didaktihkka

Oahppu fállojuvvo joatkkaoahppun oahpaheddjiide, geain ii leat sámegiella fágasuorggis

Sámegiela variašuvdna, ja didaktihkka deattuha sámegiela suopmaniid ja gielladiliid máŋggabealatvuođa, ja movt dáid áššiid sáhttá vuhtiiváldit oahpahusas. Studeanta oahpásnuvvá davvisámegiela suopmaniidda ja daid gaskavuhtii dálá čállingillii.

Oahpahus- ja eksámengiella: Oahpahus- ja eksámengiella lea davvisámegiella.

Galli lohkanbaji badjel: 1

Oahpahan- ja oahppanvuogit: Oahppoovttadat lágiduvvo deaivvademiid ja neahttaoahpahusa bokte. Lohkanbajis leat 2 fysalaš deaivvadeami. Deaivvademiid gaskkas leat neahttaoahpahus ja iešheanalaš barggut. Logaldallamat, hárjehallanbarggut, webinarat, seminárat, joavkobarggut, oktagaslaš barggut, studeantaovdanbuktimat ja bagadallan leat dábálaš bargovuogit oahpus.

Oahpu lágideapmi: Neahttadoarjjaoahpahus, mearkkaša oahppu lágiduvvo sihke fysalaš deaivvademiid ja neahttadeaivvademiid bokte.
  
Diibmoplána ja deaivvadanplána

Sisabeassangáibádusat:

Formála oahpaheaddjeoahppu ja sámegiella.

Sámegiela gáibádusa sáhttá deavdit čuovvovaš vugiid mielde: Norgga joatkkaskuvllas sámegiella 1. dahje 2. giellan 2, Suoma logahagas eatnigielladutkkus dahje lohkan sámegiela vierrogiellan ja Ruoŧa gymnásas eatnigiellan (modersmål 200 čuoggá) dahje ođđaáigásaš giellan (moderna språk 200–300 čuoggá) dahje vástideaddji sámegieloahppu doaibmi njuolggadusaid mielde. Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin dahje ceavzit giellageahččaleami maid Sámi allaskuvla lágida. Jus lea eahpesihkarvuohta man dási gelbbolašvuohta ohccis lea, de ášši ovddiduvvo fágalaš árvvoštallamii ja meannuduvvo dán vuođul.

Oahpu sisdoallu: 

Sámegiela variašuvdna, ja didaktihkka deattuha sámegiela suopmaniid ja gielladiliid máŋggabealatvuođa, ja movt dáid áššiid sáhttá vuhtiiváldit oahpahusas. Studeanta oahpásnuvvá davvisámegiela suopmaniidda ja daid gaskavuhtii dálá čállingillii. Studeanta oahppá makkár čanastat iešguđet suopmaniin lea dálá čállingillii, ja makkár vejolaš hástalusat ohppiin sáhttet čuožžilit lohkamis ja čállimis. Studeanta oahpásnuvvá sámegiela iešguđet hállijoavkkuide ja makkár dárbbut sis leat sámegieloahpahusa dáfus (vuosttašgielat, nubbingielat, ođđa hálli). Studeanta oažžu maid vuođđodieđuid sámegiela servodatsaji birra unnitlogugiellan ja máŋggagielalašvuođa iešguđet beliin sihke indiviida ja servodatdásis. Fágadidaktihkka deattuha muđuid lohkanoahppama ja -oahpahusa, ja lohkama ja čállima árvvoštallama. Studeanttat ohppet movt láhčit sámegieloahpahusa gáiddusoahpahusa bokte, sihke vuosttaš- ja nubbingielafágas.

Oahpahusas lea juhkkon čuovvovaš fáttáide:

Gielladilit (10 oč)
Davvisámegiela suopmanat, 3 oč
Máŋggagielatvuohta ja sámegielaid dilli servodagas, 2 oč
Sámegiela oinnolašvuohta, 1 oč
Čállingiela historjá, 1 oč
Gielladikšun ja váldogielaid váikkuhus, 2 oč
Sámi oahpponeavvodilli, 1 oč

Fágadidaktihkka (5 oč)
Sátneráju huksen, 1 oč
Árvvoštallan ja árvvoštallama vuođđodoahpagat, 2 oč
Gáiddusoahpahusdidaktihkka, 1 oč
Nubbingieladidaktihkka, 1 oč

Gáibádusat beassat eksámenii

Gáibádussan beassat eksámenii lea:

• 80 % oassálastin buot osiin oahpahusas.
• 2 oktagaslaš čálalaš barggu, okta reflekšuvdnačálus ja okta fágačálus. Goappásge galget gaskkal 500-800 sáni
• 1 njálmmálaš ovdanbuktin, oktagaslaččat dahje joavkkus.

Eksámen

Eksámen lea njálmmálaš eksámen, mii árvvoštallojuvvo ECTS- árvosátnevuogádaga mielde árvosániiguin A- F. Eksámen čađahuvvo oktagaslaččat.

Fágaplána, Sámegiela variašuvdna ja didaktihkka

Áigemearit ja dehálaš dáhtonat giđa oahpuide

Jus leat jearaldagat mat gusket oahpposaji ohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain e-boastta bokte: oahppohalddahus@samas.no