Sámi sosiolingvistihka perspektiivvat ja lahkonanvuogit
Oahppu gullá Sámegiela ja sámi girjjálašvuođa masterprográmma váljakurssaide
Oahpahus- ja eksámengiella: Davvisámegiella lea váldo oahpahus- ja eksámengiella. Eará sámegielat ja suoma-, ruoŧa-, dáro- ja eaŋgalsgiella sáhttet adnojuvvot omd. guosselogaldallamiin.
Oahppočuoggá: 10
Oahpahan- ja oahppanvuogit: Logaldallamat, hárjehusat, studeanttaid čálalaš barggut ja bargoseminárat.
Fágalaš latnjalasvuohta: Oahpus lea 10 oč fágalaš latnjalasvuohta ovddeš SÁM 313 Sámi sosiolingvistihkka (10 oč) oahpuin.
Oahpu lágideapmi: Neahttaoahpahus
Diibmoplána ja deaivvadanplána
- Sisabeassangáibádusat:
Ohccis galgá leat sámegiela ja sámi girjjálašvuođa bachelorgráda dahje vástideaddji oahppu. Gáibiduvvo, ahte ohccis leat 90 oahppočuoggá čiekŋudanoahput sámegielas eatnigiellan. Bachelorgráda gaskamearálaš árvosátni galgá leat C dahje buoret. Studeanttain, geain lea cand.mag.-dutkkus, galgá leat sámegielas gaskamearálaš árvosátnin 2,7 dahje buoret.
- Oahpu sisdoallu:
Oahpu sisdoallu huksejuvvo sámegiela ja sámi girjjálašvuođa bachelorprográmma gielladieđalaš oahpuid ala. Sisdoalu lea muhtun muddui vejolaš heivehit studeanttaid ovddeš diehtodási ja dutkanplánaid mielde. Oahpu ulbmil lea oahpásnuvvat čuovvovaš gažaldagaide sosiolingvistihka suorggis: kvantitatiivvalaš ja kvalitatiivvalaš dutkanmetodat, gielaid ceavzinnávccat ja daid árvvoštallan, giellaideologiijat, giellapolitihkka, giellarievttit ja giellaplánen. Oahppu addá
máŋggabealat gova sosiolingvistihka perspektiivvain ja lahkonanvugiin, ja daid vuođul studeanta hárjána árvvoštallat sámeservošiid ja eará joavkkuid giellasosiologalaš dárbbuid ja viggamušaid.
- Gáibádusat beassat eksámenii
Čuovvovaš gáibádusat leat eaktun beassat eksámenii:
- studeanta lea searvan unnimustá 80% oahpahussii
- čállit guokte unnimustá 4-siidosaš čálalaš barggu lohkanmeari ja/dahje logaldallamiid vuođul
- ovdanbuktit čálalaš bargguid bargosemináras
juohke bargosemináras fágalaččat kommenteret unnimustá ovtta mielstudeantta barggu
- Eksámen
Eksámen lea 2-vahkkosaš čálalaš ruovttubargu sosiolingvisttalaš fáttás. Čállosa guhkkodat lea 10–13 siiddu.
Árvvoštallan: Árvosátni A–F.
Oahppoplána - Sámi sosiolingvistihka perspektiivvat ja lahkonanvuogit
Áigemearit ja dehálaš dáhtonat giđa oahpuide
Jus leat jearaldagat mat gusket oahpposaji ohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain e-boastta bokte: oahppohalddahus@samas.no
