Sámi báikenammadutkan
Gursa gullá Sámegiela ja sámi girjjálašvuođa masterprográmma fága- dahje váljagurssaide
Gurssas guorahallojuvvojit báikenammafága teorehtalaš suorggit erenoamážit sámi nammadutkama geahččanguovllus vai studeanta oahppá dovdat toponomastihka váldoteoriijaid ja oahppá heivehit dáid sámi báikenammafágii
Oahpahus- ja eksámengiella: Davvisámegiella lea váldooahpahusgiellan. Eará sámegielat ja suoma-, ruoŧa-, dáro- ja eaŋgalsgiella sáhttet adnojuvvot omd. guosselogaldallamiin.
Oahppočuoggá:10
Oahpahan- ja oahppanvuogit: Logaldallamat, hárjehusat, studeanttaid čálalaš barggut ja bargoseminárat.
Diibmoplána ja deaivvadanplána
- SISABEASSANGÁIBÁDUSAT
Sisabeassangáibádussan leat Sámegiela ja sámi girjjálašvuođa masterprográmma oppalaš sisabeassangáibádusat mat leat čilgejuvvon oahppoprográmmaplánas
- SISDOALLU
Gurssas guorahallojuvvojit báikenammafága teorehtalaš suorggit erenoamážit sámi nammadutkama geahččanguovllus vai studeanta oahppá dovdat toponomastihka váldoteoriijaid ja oahppá heivehit dáid sámi báikenammafágii. Gurssa sisdoallu huksejuvvo bacheloroahpu gielladieđalaš gurssaid ja erenoamážit SÁM 240 Láidehus sámi báikenammadutkamii -gurssa metodologalaš oahpu ala. Gurssas biddjo váldodeaddu oahpásnuvvat čuovvovaš teorehtalaš surggiide: typologalaš nammadutkan; etymologalaš nammadutkan; kontáktaonomastihkalaš dutkan; sosioonomastihkalaš dutkan; nammaduovdagiid ja nammapolitihka dutkan (politoonomastihkalaš dutkan).
- GÁIBÁDUSAT BEASSAT EKSÁMENII
Gurssa áigge studeanta čállá guokte unnimustá 4-siidosaš čálalaš barggu lohkanmeari ja/dahje logaldallamiid vuođul. Barggut ovdanbuktojit bargoseminárain, ja studeanta galgá maiddái fágalaččat kommenteret unnimustá ovtta mielstudeantta barggu.
Barggut árvvoštallojuvvojit dohkálažžan/ii dohkálažžan. Dat galget leat dohkkehuvvon ovdal go studeanta beassá eksámenii.
- EKSÁMEN
2-vahkosaš čálalaš ruovttubargu báikenammateorehtalaš fáttás. Čállosa guhkkodat lea 10–13 siiddu. Árvvoštallan: Árvosátni A–F.
OAHPPOPLÁNA, SÁMI BÁIKENAMMADUTKAN-SÁM 306
Áigemearit ja dehálaš dáhtonat giđa oahpuide
Jus leat jearaldagat mat gusket oahpposaji ohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain e-boastta bokte: oahppohalddahus@samas.no
