Sámegiela ja sámi girjjálašvuođa masterprográmma

Sámegiela ja sámi girjjálašvuođa masterprográmma ulbmilin lea hukset ja nannet sámi álbmoga eatnigiela ja girjjálašvuođa fágamáhtu. Sámegiela ja sámi girjjálašvuođa masterprográmma addá buori oppalaš vuođu bargat máŋggalágan giella- ja teakstagažaldagaiguin. Oahppu hukse maiddái vuođu doavttirgrádaoahpuide. 

• Oahpahus- ja eksámengiella: Oahpahusgiellan lea dábálaččat davvisámegiella. Eksámengiellan lea davvisámegiella dahje eará sámegiella.  
• Oahppočuoggá: 120 
• Oahppoáigi: 2 jagi
• Oahpahan- ja oahppanvuogit: Eanas oassi oahpahusas lágiduvvo neahttaoahpahussan ja oassi fysalaččat Guovdageainnus. Oassi oahpahusas lea geatnegahtton muhtun oahpuin. Oahpahusa lágideapmi lea čilgejuvvon dárkileappot ovttaskas oahpuid oahppoplánain.  
• Diibmoplána ja deaivvadanplána: TimeEdit 
• Ohcanwebas Vállje: 

Sisabeassangáibádusat: 

• Sámegiela ja sámi girjjálašvuođa bachelorgráda eatnigiel dásis dahje vástideaddji oahppu. 
• Gáibiduvvo ahte ohccis leat 90 oahppočuoggá čiekŋudanoahput sámegielas eatnigiellan. 
• Bachelorgráda gaskamearálaš árvosátni galgá leat C dahje buoret. Studeanttain geain lea cand.mag.-dutkkus, galgá leat sámegielas gaskamearálaš árvosátnin 2,7 dahje buoret. 

Oahpu sisdoallu:  

Masterprográmma lea huksejuvvon sámegiela ja sámi girjjálašvuođa eatnigiel dási bachelorprográmma ala, ja addá studentii čiekŋalut áddejumi sámegielas ja sámi girjjálašvuođas. Prográmmas leat golbma oktasaš oahpu (30 oč.), golbma válljenmuni oahpu (30 oč.) ja 60 oahppočuoggá masterbargu. Studentii nammaduvvo nuppi lohkanbajis bagadalli guhte bagadallá studeantta masterbarggu čállima. 

Geatnegahtton oahput leat: 

• OKT 304 Sámegiela ja sámi girjjálašvuođa dutkanhistorjá (10 oč.) 
• OKT 305 Akademalaš čállinseminára (10 oč.) 
• OKT 307 Dieđalaš bargu ja dutkanmetodat (10 oč.) 

Prográmma válljenmuni oahput leat: 

• SÁM 303 Giellahistorjá II (10 oč.) 
• SÁM 304 Eamiálbmotgirjjálašvuohta – historjá, dutkan ja teoriijat (10 oč.) 
• SÁM 306 Sámi báikenammadutkan (10 oč.) 
• SÁM 307 Dajahusat ja sámi lyrihkka (10 oč.) 
• SÁM 311 Terminologiijadieđa ja vuođđoealáhusaid fágagiella (10 oč.) 
• SÁM 312 Cealkka- ja hápmeoahpa dutkan (10 oč.) 
• SÁM 314 Jietnadatoahpa dutkan (10 oč.) 
• SÁM 316 Akademalaš gaskkusteapmi ja gulahallan (10 oč.) 
• SÁM 317 Giellagáhtten ja teakstaoahppa (10 oč.) 
• SÁM 318 Sámi sosiolingvistihka perspektiivvat ja lahkonanvuogit (10 oč.) 

Masterbargu: 

• SÁM 321 Masterbargu (60 oč.) 

Árvvoštallanvuogit

Sámegiela ja sámi girjjálašvuođa masterprográmma oahpuid eksámenvuogit leat čálalaš barggut, máhppaeksámenat, ruovttueksámenat ja njálmmálaš eksámenat. 

Árvvoštallanvuogit bohtet ovdan iešguđege oahpu oahppoplánas.

Bargo- ja joatkkaoahppovejolašvuođat

Masterprográmma hukse nana fágalaš vuođu bargat sámegielain ja girjjálašvuođain oahpahusja dutkansurggiin ja iešguđetlágan servodat- ja fágasurggiin main gáibiduvvo nana sámegielgealbu ja gos girjjálašvuohta buvttaduvvo ja gaskkustuvvo. Oahppu addá gelbbolašvuođa bargat universitehta- ja allaskuvlasuorggis, máŋggalágan almmolaš hálddahusain, kulturásahusain ja girjelágádusain, fitnodagain, mediaásahusain ja eará sajiin gos dárbbašuvvo alla dási áššedovdamuš sámegielas ja/dahje sámi girjjálašvuođas. 

Masteroahppu ovttas praktihkalaš-pedagogalaš oahpuin addá gelbbolašvuođa oahpahit sámegiela vuođđo- ja joatkkaskuvllas. 

Masteroahppu addá gelbbolašvuođa ohcat doavttirgrádaprográmmii.

Prográmmaplána 

Jus leat jearaldagat mat gusket oahpposaji ohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain e-boastta bokte: oahppohalddahus@samas.no