Sámegiela ja sámi girjjálašvuođa bargohárjehallan
Bargohárjehallama ulbmil lea nannet studeantta fágalaš máhtu praktihkalaš barggu bokte. Studeanta beassá praktihkalaš bargodilis geavahit oahpu maid lea háhkan sámegiela ja sámi girjjálašvuođa bachelorprográmma fágaoahpuin
Oahpahus- ja eksámengiella: Oahpahus- ja eksámengiella lea davvisámegiella. Bargohárjehallan čađahuvvo davvisámegillii
Galli lohkanbaji badjel: Ovtta
Oahpahan- ja oahppanvuogit:
Oahpu lágideapmi: Oahpus leat guokte neahttadeaivvadeami. Bargohárjehallan čađahuvvo fysalaččat bargosajis. Eksámenseminára lágiduvvo Sámi allaskuvllas, ja dasa ii sáhte searvat neahta bokte.
Diibmoplána ja deaivvadanplána
- Sisabeassangáibádusat:
- Dábálaš sisabeassangáibádusat alitohppui. Sisabeassanvuođđu sáhttá leat juogo oppalaš lohkangelbbolašvuohta (čađahan joatkkaskuvlla, logahaga dahje gymnása) dahje reálagelbbolašvuohta. Reálagelbbolašvuođaohcciin galget deavdit gustovaš gáibádusaid ja duođaštit formála gelbbolašvuođa eŋgelasgielas. Oppalaš lohkangelbbolašvuođa gáibádusat olgoriikkaohcciide bohtet ovdan GSU-listtus. Go oahppu lágiduvvo sámegillii, de olgoriikkaohcciide ii gusto dárogielgáibádus, vrd. Forskrift om opptak til høgare utdanning § 2-2 (6).
- Sámegielmáhttu
- Studeanta galgá leat čađahan unnimusat 40 oahppočuoggá sámegiela ja sámi girjjálašvuođa bachelorprográmma geatnegahtton fágaoahpuid
Sámegiela gáibádusa sáhttá deavdit čuovvovaš vugiid mielde: Norgga joatkkaskuvllas sámegiella 1. dahje 2. giellan 2, Suoma logahagas eatnigielladutkkus dahje lohkan sámegiela vierrogiellan ja Ruoŧa gymnásas eatnigiellan (modersmål 200 čuoggá) dahje ođđaáigásaš giellan (moderna språk 200–300 čuoggá) dahje vástideaddji sámegieloahppu doaibmi njuolggadusaid mielde. Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin dahje ceavzit giellageahččaleami maid Sámi allaskuvla lágida. Jus lea eahpesihkarvuohta man dási gelbbolašvuohta ohccis lea, de ášši ovddiduvvo fágalaš árvvoštallamii ja meannuduvvo dán vuođul.
- Oahpu sisdoallu:
Bargohárjehallama ulbmil lea nannet studeantta fágalaš máhtu praktihkalaš barggu bokte. Studeanta beassá praktihkalaš bargodilis geavahit oahpu maid lea háhkan sámegiela ja sámi girjjálašvuođa bachelorprográmma fágaoahpuin
Bargohárjehallamis studeanta bargá guhtta (6) vahkku, 35 diimmu vahkkui, ovtta dahje guovtti bargosajis mas leat doaimmat main beassá geavahit sámegiela ja/dahje sámi girjjálašvuođa fágamáhtu. Bargohárjehallanbáikki bargogiellan galgá ollásit dahje belohahkii leat sámegiella, ja studeantta njálmmálaš ja čálalaš bargogiellan galgá leat sámegiella.
Bargosadji sáhttá leat ovdamearkka dihte giellaguovddáš, girjerájus, girjelágádus, skuvla, mánáidgárdi, allaskuvla dahje universitehta, aviisa, rádio, festivála, Sámediggi dahje eará almmolaš dahje priváhta ásahus dahje organisašuvdna.
Barggut sáhttet leat earret eará giellabagadallan, gielladárkkisteapmi, korrekturlohkan, sámegiela ja/dahje sámi girjjálašvuođa oahpaheapmi ja oahppomateriála ráhkadeapmi, transkriberen, jorgaleapmi, čáppagirjjálaš teavsttaid árvvoštallan ja/dahje bagadallan ja giella- ja/dahje girjjálašvuođadoaluid lágideapmi.
Studeanta ohcá ieš hárjehallanbargosaji, ja oahpu koordináhtor galgá árvvoštallat ja dohkkehit bargosaji maŋimusat mánu ovdal go bargohárjehallan álgá. Hárjehallanbargosadji galgá leat dakkár gos studeanta beassá searvat bargguide mat leat relevánttat su fágalaš gelbbolašvuhtii ja bargosaji dárbbuide. Hárjehallanbargosadji berre leat eará go studeantta iežas bargosadji. Studentii ii máksojuvvo bálká bargohárjehallama áigge.
Studentii nammaduvvo bargosajis unnimusat okta gulahallanolmmoš gii čuovvu ja bagadallá su bargohárjehallama áigge soahpamuša mielde. Gulahallanolmmoš dahje bargosadji ii oaččo ekonomalaš doarjaga dan doaimmas.
Bargohárjehallama áigge studeanta čállá 6–9-siidosaš bargohárjehallanbeaivegirjji man fáttát sohppojuvvojit oahpu koordináhtoriin ovdal hárjehallama. Maŋŋel bargohárjehallama studeanta čállá 3–5-siidosaš raportta mas čilge, suokkardallá ja árvvoštallá bargohárjehallama doaimmaid ja vásáhusaid.
- Gáibádusat beassat eksámenii
Čuovvovaš gáibádusat leat eaktun beassat eksámenii:
- Gávdnat hárjehallanbargosaji alcces maid oahppokoordináhtor dohkkeha
- Bargat bargosajis unnimusat 80 proseantta šihttojuvvon bargoáiggis
- Čállit 6–9-siidosaš bargohárjehallanbeaivegirjji
- Čállit 3–5-siidosaš bargohárjehallanraportta
Buot bargogáibádusat čađahuvvojit oktagaslaččat ja galget leat dohkkehuvvon ovdal go studeanta beassá eksámenii.
- Eksámen
Eksámen lea 10 minuhta njálmmálaš ovdanbuktin 3–5-siidosaš hárjehallanraportta vuođul semináras mii lágiduvvo maŋŋel hárjehallama ja masa SÁM-2010-oahpu studeanttat servet. Maŋŋel ovdanbuktima lea 10 minuhta ságastallan ovdanbuktima birra masa servet eará studeanttat ja oahpu koordináhtor.
Eksámen árvvoštallojuvvo árvosániin ceavzán dahje ii-ceavzán
Oahppoplána,Sámegiela ja sámi girjjálašvuođa bargohárjehallan
Áigemearit ja dehálaš dáhtonat giđa oahpuide
Jus leat jearaldagat mat gusket oahpposaji ohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain e-boastta bokte: oahppohalddahus@samas.no
