SÁM 321 Masterbargu

• Oahpahus- ja eksámengiella: Semináraid váldogiellan lea dábálaččat davvisámegiella. Masterbarggu galgá čállit muhtun sámegillii
• Oahppočuoggá:  60
• Oahppoáigi: Golmma: vuosttaš, goalmmát ja njealját lohkanbaji
• Oahpahan- ja oahppanvuogit:  Iehčanas dutkanbarggu čađaheapmi, bagadallanseminárat ja individuála bagadallan. Masterbarggu doarjjan lágiduvvo oahppu OKT 305 Akademalaš čállinseminára. Dasa lassin lágiduvvojit oktasaš, geatnegahtton bagadallanseminárat.
• Oahpu lágideapmi: Muhtun bagadallanseminárat lágiduvvojit fysalaččat Sámi allaskuvllas, muhtun seminárat ges neahttasemináran. Fysalaš semináraide ii leat vejolaš searvat neahta bokte.

 
Diibmoplána ja deaivvadanplána: TimeEdit  

Ohcanwebas vállje :   “SAM 321 Masterbargu (masternivå) 60sp 

Sisabeassangáibádusat:   

Oahppu lea rabas dušše sámegiela ja sámi girjjálašvuođa masterprográmma studeanttaide. Čujuhuvvo oahppoprográmma sisabeassangáibádusaide mat leat čilgejuvvon prográmmaplánas.

Oahpu sisdoallu:  

Studeanta vállje masterbarggu loahpalaš fáttá ovttas bagadalliin. Bagadallanseminárain lea vejolašvuohta ságastallat ovttas eará studeanttaiguin ja bagadalliin dutkanprošeavtta birra. Masterbarggu guhkkodat galgá leat 70–120 siiddu. 3 Masterbarggu čađaheapmi álgá vuosttaš lohkanbajis (5 oč.) ja váldodeaddu lea goalmmát (25 oč.) ja maŋimuš lohkanbajiin (30 oč.). Studentii nammaduvvo bagadalli nuppi lohkanbajis, ja studeanta ja bagadalli hábmeba ja vuolláičálliba bagadallanšiehtadusa maŋimusat goalmmát lohkanbaji álggus.

Gáibádusat beassat eksámenii  

Čuovvovaš gáibádusat leat eaktun beassat eksámenii: 

− Vuosttaš lohkanbajis galgá studeanta njálmmálaččat ovdanbuktit iežas masterbarggu dutkanplána (geahča dutkanplána čilgehusa OKT 305 Akademalaš čállinseminára 4 oahppoplánas) bagadallansemináras, mas fágaoahpaheaddji ja eará studeanttat besset dan kommenteret. Njálmmálaš ovdanbuktin galgá leat sullii 15 minuhta guhku. 

− Studeanta ferte čađahan buot eará osiid oahppoprográmmas ovdal sáhttá geiget masterbarggu. Studeanttas lea vejolašvuohta ohcat beassat geiget masterbarggu ovdal, jus leat earenoamáš ákkat dasa.

 − Bagadallan lea oahpu geatnegahtton oassi ja dat galgá leat čađahuvvon ovdalgo sáhttá addit masterbarggu árvvoštallamii. Masterbargu addojuvvo árvvoštallamii maŋimuš lohkanbaji áigge, jus eará ii leat šihttojuvvon. 

− Studeanta galgá leat searvan unnimusat guovtti bagadallanseminárii vuosttaš oahppojagi ja golmma bagadallanseminárii nuppi oahppojagi. 

− Studeanta galgá leat opponeren unnimusat njeallje seminárabarggu.

Eksámen  

Eksámen lea golmma oasis: 

1. 70–120-siidosaš dieđalaš bargu. Dárkilit dieđut masterbarggu hámi birra leat Sámi allaskuvlla masterbargguid máladokumeanttas.

 2. Studeanta doallá 30–45-minuhtasaš rabas logaldallama masterbarggu birra. 

3. Rabas logaldallama maŋŋel lea studeanttas njálmmálaš eksámen mas sensorat gažadit kandidáhta masterbarggu birra.

Kandidáhtta oažžu gaskaboddosaš árvosáni masterčállosis ovdal rabas logaldallama. Árvosátni sáhttá muddejuvvot gitta ovttain cehkiin maŋŋil rabas logaldallama ja njálmmálaš eksámena. 

Árvvoštallan lea ECTS-vuogádaga árvosániid mielde, mas buoremus árvosátni lea A ja vuolimus ceavzinárvosátni lea E. F-árvosátni mearkkaša ahte ii leat ceavzán

 

Oahppoplána 

Jus leat jearaldagat mat gusket oahpposaji ohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain e-boastta bokte: oahppohalddahus@samas.no