SÁM-1007 Gielladikšun I

Oahpus geahčadit gielladikšuma vuođđoáššiid ja ulbmiliid, ja davvisámegiela čálalaš giellageavahusa norpmaid.

• Oahpahus- ja eksámengiella: Oahpahus- ja eksámengiella lea davvisámegiella.
• Oahppočuoggá: 10  
• Oahppoáigi:  ovtta lohkabáji badjel 
• Oahpahan- ja oahppanvuogit: Oahpahan- ja oahppanvuogit leat logaldallamat, čálalaš ja njálmmálaš hárjehusat, semináraovdanbuktimat, joavkobarggut, iešheanalaš barggut ja bagadallamat.
• Oahpu lágideapmi: Neahttadoarjjaoahpahus, oassi oahpahusas lágiduvvo fysalaččat Sámi allaskuvllas ja oassi neahttaoahpahussan. Ii leat vejolaš searvat fysalaš deaivvademiide neahta bokte.

Diibmoplána ja deaivvadanplána: TimeEdit 

Ohcanwebas vállje :  “2140 Gielladikšun I (bachelornivå) 10sp”

Sisabeassangáibádusat:  

• Dábálaš sisabeassangáibádusat alitohppui. Sisabeassanvuođđu sáhttá leat juogo oppalaš lohkangelbbolašvuohta (čađahan joatkkaskuvlla, logahaga dahje gymnása) dahje reálagelbbolašvuohta. Oppalaš lohkangelbbolašvuođa gáibádusat olgoriikkaohcciide bohtet ovdan GSU-listtus. Go oahppu lágiduvvo sámegillii, de olgoriikkaohcciide ii gusto dárogielgáibádus, vrd. Forskrift om opptak til høgare utdanning § 2-2 (6)
• Sámegielmáhttu 
• Čađahan SÁM-1000 Láidehus gielladiehtagii (10 oč.) dahje vástideaddji oahpu 

Sámegiela gáibádusa sáhttá deavdit čuovvovaš vugiid mielde: Norgga joatkkaskuvllas sámegiella 1. dahje 2. giellan 2, Suoma logahagas eatnigielladutkkus dahje lohkan sámegiela vierrogiellan ja Ruoŧa gymnásas eatnigiellan (modersmål 200 čuoggá) dahje ođđaáigásaš giellan (moderna språk 200–300 čuoggá) dahje vástideaddji sámegieloahppu doaibmi njuolggadusaid mielde. Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin dahje ceavzit giellageahččaleami maid Sámi allaskuvla lágida. Jus lea eahpesihkarvuohta man dási gelbbolašvuohta ohccis lea, de ášši ovddiduvvo fágalaš árvvoštallamii ja meannuduvvo dán vuođul

Oahpu sisdoallu: 

Oahpus geahčadit gielladikšuma vuođđoáššiid ja ulbmiliid, ja davvisámegiela čálalaš giellageavahusa norpmaid. Studeanta oahpahallá árvvoštallat, divvut ja buoridit ovttaskas cealkagiid ja oanehis teavsttaid gielladikšuma dáfus. Studeanta hárjehallá čállit oanehis, gielalaččat njuovžilis áššeteavsttaid main čuovvu čálalaš giellageavahusa norpmaid, ja oahpahallá analyseret iežas teavsttaid gielladikšunperspektiivvas. Oahpus deattuhuvvo sátnehámiid sojahus ja geavahus, ja cealkkaráhkadusaid váldoáššit. Váldogielaid váikkuhusa dáfus deattuhuvvojit skandinávalaš gielat. Studeanta oahpahallá atnit veahkkeneavvuid mat leat anolaččat gielladárkkistanbarggus.

Gáibádusat beassat eksámenii 

Čuovvovaš gáibádusat leat eaktun beassat eksámenii: 

• Studeanta galgá leat ožžon dohkkehuvvot guhtta (6) 1–3-siidosaš čálalaš geatnegahtton barggu. Bargguide gullá geatnegahtton bagadallan.   

• Studeanta galgá leat searvan geatnegahtton seminárii mas lea ovdanbuktán ovtta dan guđa geatnegahtton barggus ja opponeren unnimusat ovtta eará studeantta barggu.   

Eksámen

Guđa (6) diimmu oktagaslaš čálalaš skuvlaeksámen. 

Árvosánit addojuvvojit ECTS vuogádaga mielde, mas A lea buoremus árvosátni ja E lea vuolemus ceavzinárvosátni. F árvosátni mearkkaša ahte ii leat ceavzán

Oahppoplána 

Jus leat jearaldagat mat gusket oahpposaji ohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain e-boastta bokte: oahppohalddahus@samas.no