Sámi allaskuvlla girjerádjosa luoikkahannjuolggadusat

Sámi allaskuvlla girjerádju lea fága- ja dutkanfágagirjerádju. Čoakkáldagain leat fysalaš ja digitála materiálat, ja vuoigatvuođat ja geatnegasvuođat gustojit sihke fysalaš girjerájusmateriálaid luoikkaheapmái ja girjerádjosa elektrovnnalaš resurssaid geavaheapmái.

Luoikkaheaddji lea dohkkehan luoikkahannjuolggadusaid go luoikkahangoarta lea váldon atnui. Luoikkaheaddji lea geatnegahtton oahpásmuvvat girjerádjosa luoikkahannjuolggadusaide. Luoikkahankoarta lea persovnnalaš, ja koartta ii leat lohpi luoikat earáide.

Bargiid luoikkahankoarta lea implementerejuvvon bargikortii, ja studeanttaid ges studeantakoarttas. Sierra njuolggadusat gusket olgguldas geavaheddjiide.
 

Girjerájusbálvalusat

Leat iešguđetlágán luoikkahanvuoigatvuođat dan duohken makkár čanastat lea Sámi allaskuvlii.

Bargiin ja studeanttain lea vuoigatvuohta atnit buot materiálaid máid girjerájus eaiggáda, ja maidda eai leat makkárge erenoamáš geavahangáržžideamit. Sii sáhttet diŋgot dokumeanttaid girjerájuskataloga Oria bokte. Dáidda geavaheaddjiide fállojuvvo maid luoikkahanbálvalus eará girjerádjosiin (gáiddusluoikkaheapmi).

Sámi allaskuvlla studeanttaid geat čuvvot gáiddusoahpuid, dehe geain eará sivaid geažil lea oahppobáiki olggobealde campusa, bivdit váldit oktavuođa girjerádjosiin girjjálašvuođa olaheami oktavuođas.

Girjerájus fállá bálvalusaid lassin vuođđobálvalusaide geavaheddjiide geat gullet institušuvnnaide main lea formálalaš šiehtadus girjerádjosiin.

Ovttaskasolbmot geat eai gula institušuvdnii mas lea formálalaš šiehtadus, fertejit iežaset institušuvnnas dahje álbmotgirjerádjosis ohcat bálvalusaid.

Luoikkaheaddji ovddasvástádus

Dokumeanttaid maid luoikkaheaddji váldá olggos girjerádjosis galget registrerejuvvot. Luoikkaheaddji lea persovnnalaččat ovddasvástideaddji buot dokumeanttaide mat leat registrerejuvvon su luoikkahankortii. Luoikkahuvvon materiálaid ii leat lohpi luoikat earáide. Luoikkahankoarta lea persovnnalaš, ja ii leat lohpi luoikat koartta earáide.

Ii leat lohpi luoikkahit nuppi luoikkaheaddji namas eará jus čálalaš fápmudus lea vuođđun. Fápmudus registrerejuvvo girjerájusvuogádahkii.

Girjerádjosa opmodaga (girjjiid, mediaid jnv.) billisteapmi sáhttá mielddisbuktit buhtadusovddasvástádusa ja restrikšuvnnaid girjerádjosa bálvalusaid geavaheamis, ja maiddái luoikkahanvuoigatvuođa massima.

Luoikkaheaddji geatnegahtto dieđihit jus rievdada čujuhusa, e-poastačujuhusa, telefonnummára ja jus geavaheaddjičanastat Sámi allaskuvlii rievdá (heaitá bargin/studeantan).

Luoikkaheapmi

Dábálaš luoikkahanáigi lea 4 vahku. Muhtun dokumeantatiippain lea luoikkahanáigi 1 vahkku. Lea vejolaš ođasmahttit luoikkahemiid nu guhká go dokumeanttas ii leat vuordinlistu. Jus eará luoikkaheaddjit várrejit dokumeantta, de gohččojuvvo dokumeanta ruovttoluotta go luoikkahanáigi nohka.

Áigemearri viežžat várrejuvvon dokumeantta lea 5 árgabeaivvi. Dan maŋŋel fállojuvvo luoikan nuppi luoikkaheaddjái vuordinlisttus, dehe dokumeanta máhcahuvvo čoakkáldahkii.

Oasit čoakkáldagas sáhttet dušše geavahuvvot girjerádjosis, ja daid ii sáhte luoikkahit. Iešguđetlágan luoikkahanvejolašvuođat bohtet ovdan Orias.

Luoikkahuvvon materiálaid máhcaheapmi

Luoikkahuvvon materiálaid galgá máhcahit go luoikkahanáigi nohká. Jus luoikkahuvvon materiálat eai leat máhcahuvvon dehe ođasmahtton áigemearrái, de massá luoikkaheaddji vuoigatvuođa geavahit girjerádjosa bálvalusaid. Girjerájus sáhttá sáddet buhtadusgáibádusa materiálaid ovddas mat eai leat máhcahuvvon. Buhtadusgáibádus lea  600,- NOK juohke dokumeanttas. Dokumeanttaide maid lea váttis háhkat, sáhttá buhtadusgáibádus árvvoštallot alibun. Molssaeaktun sáhttá luoikkaheaddji šiehtadit lonuhusgáhppálaga oastit.

Gáiddusluoikkaheapmi

Materiála maid girjerájus ieš ii eaiggáduša, sáhttá luoikkahuvvot eará girjerádjosiin.
Dát bálvalus fállojuvvo dušše Sámi allaskuvlla bargiide ja studeanttaide, dehe jus dakkár bálvalusfálaldat lea ovttasbargošiehtadusas Sámi allaskuvllain. Gáiddusluoikkahuvvon dokumeanttaide gustojit eaiggátgirjerádjosa luoikkahannjuolggadusat. Vissis dokumeanttaid ii leat vejolaš luoikkahit ruoktot. Dáid materiálaid ferte geavahit dihto báikkis girjerádjosis.

Jus elektrovnnalaš veršuvdna dokumeanttas lea olámuttus girjerádjosis, de ii gáiddusluoikkahuvvo dokumeanta báberhámis eará jus leat earenoamáš ákkat.

Hattit ja buhtadusat

Girjerádjosa bálvalusat leat nuvttá.

Buhtadus dokumeanttaid ovddas mat eai máhcahuvvo lea unnimusat 600,- NOK juohke dokumeanttas. Dokumeanttaide maid lea váttis háhkat, sáhttá buhtadusgáibádus árvvoštallot alibun. Molssaeaktun sáhttá luoikkaheaddji šiehtadit lonuhusgáhppálaga oastit.

Máŋgen luoikkahankoarttain (bargikoarttain) lea nuvttá bargiide. Studeanttaide registrerejuvvo máŋggusdivat luoikkahankortii (studeanttakortii). Sierra njuolggadusat gustojit olggobeali geavaheddjiide.

Buot máŋgemat galget dahkkot Kopinor-šiehtadusa gaskal universitehtaid ja allaskuvllaid vuođul.

Njuolggadusat gustojit 01.07.2024 rájes.