Brage

Brage ásahuslaš dutkanvuorká

Brage lea Sámi allaskuvlla rabas institušuvnnalaš vuorká fágalaš ja dieđalaš bargguid várás, ja nu gohčoduvvon ruoná Open Access-almmuhus. Buot dokumeanttat arkiivvas leat gávdnamis nuvttá neahtas olles teakstan. Dán vuorkkás galgá allaskuvlla fágalaš buvttadeapmi registrerejuvvot, gč. Dutkan- ja oahpustivrra mearrádusaid DOS 113/2010 ja DOS 3/2014 mielde.

Manne vurket Brage:ii?

Brage dahká dutkama oainnusin ja nuvttá buohkaide olámuddun. Dasa lassin sihkkarastá arkiiva oadjebas guhkesáiggi vurkema dutkanbargguin ja studeantabargguin. Go dokumeanta lea registrerejuvvon Brage báikái, de oažžu bistevaš liŋkka man sáhttá geavahit ovdamearkka dihtii čujuheamis.

Dieđalaš barggut Brages šaddet ohcanláhkái dáppe:

•  Nora (institušuvnnalaš vuorkkát Norggas)
• OpenDOAR (institušuvnnalaš vuorkkát olles máilmmis)
• OpenAIRE (EU prošeakta ja ohcanmohtor institušuvnnalaš vuorkkát)
• Oria (Norgga fága- ja dutkangirjerádjosiid ohcanreaidu)
• Google ja eará ohcanmohtorat

Norgga dutkanráđđi (NDR) lea ráhkadan strategiija rabas beassamii dieđalaš almmuheapmái, ja dán strategiija ektui bidjet gáibádusaid dasa ahte dieđalaš almmuheamit mat leat vuođđuduvvon DoB- prošeavttain finansierejuvvon NDR bokte, galget aktiverejuvvot rabas institušuvdnavuorkkáide. Loga eambbo.

Vurket Brage:ii

Go leat almmuhan artihkkala dahje eará fágalaš barggu, de sáhtát váldit oktavuođa dutkanhálddahusain dahje girjerádjosiin bijahit barggu Brage institušuvdnavuorkái. Don sáhtát maiddái viežžat iežat dokumeantta go leat registreren Cristin: ii.

Dutkanhálddahus sáhttá veahkehit guorahallat makkár čanastagat/ráddjejumit almmuheddjiin leat mii guoská institušuvdnavuorkái vurkemii. Don fertet maiddái vuolláičállit čállišiehtadusa arkiveremis allaskuvlla dutkanarkiivii. Dutkanossodat vurke šiehtadusa allaskuvlla arkiivavuogádahkii.

Dahkkivuoigatvuohta

Vurken Brage-vuorkkás dáhkko daid rámmaid siskkobealde maid čálli lea dahkan almmuheddjiin. Dutkanhálddahus dárkkista danin ahte arkiveren Brage:ii ii leat vuostá almmuheddjiid iežaset vurkennjuolggadusaid. Jus leat vuolláičállán eará soahpamuša go standárda, de fertet dan dieđihit. Gávdnojit čálli-lasáhusat maid SPARC ja Creative Commons leat ráhkadan, mainna sáhtát sihkkarastit iežat vuoigatvuođaid, it dušše bidjat artihkkaliid nehttii, muhto maiddái geavahit ođđasit materiálaid eahpekommersiála oktavuođain, ovdamearkka dihtii oahpahusas.

Almmuheaddjit dávjá eai háliit ahte áigečállaga PDF (publisher's PDF) geavahuvvo. Muhto maŋimuš giehtačálus lea dábálaččat dohkálaš maŋŋá fágalaš árvvoštallama (post-print). Lágádusaid vurkenpolitihka institušuvnnalaš vuorkkáide gávdno Sherpa/Romeo neahttasiiddus. Váldde oktavuođa dutkanhálddahusain jus dárbbašat veahki.

Du dahkkivuoigatvuođat bisuhuvvojit materiálaide mat leat Brage vuorkkás. Nappo it masse vuoigatvuođaid almmuhit almmuhusaid eará sajiin go vurket daid Brage:ii.

Loga eambbo dahkkivuoigatvuođaid birra rabas almmuheami ektui.