Earenoamáš musihkkaoahppu Sámi allaskuvlla studeanttaide

Olles mannan vahkku leat Sámi allaskuvlla studeanttat leamaš Sámi musihkkaakademiijas Ohcejogas ja čađahan sámi musihkkavahkku. – Váldojurdda lea fállat sidjiide musihkkaoahpu, mii lea áidnalunddot, dasgo dakkár musihkkaoahpu ii leat vejolaš gazzat gostige eará sajis, muitala koordináhtor ja oahpaheaddji Annukka Hirvasvuopio-Laiti.  

Earenoamášvuohta musihkkavahkkus lea ahte oahpahusa vuođđun ja vuolggasadjin lea sámegiella ja sámekultuvra. Ulbmil musihkkaoahpahusain lea ahte dat galgá doarjut studeanttaid geavahit sámegiela, sámekultuvrra ja sámemusihka vuođđun iežaset bargguin.   

- Dát nanne studeanttaid sámi identitehta, doarju ja nanne sámegiela geavaheami ja sámi musihkkaárbbi seailluheami. Mis lea earret eará leamaš fáddán árbevirolaš sámemusihkka dego luohti, juoigan ja levden. Muđui lea maid leamaš musihkkapedagogihka, lávlun, instrumeantta čuojaheapmi ja musihkkateknologiija,  muitala Annukka.  

Musihkkavahkkus ovddidit ja gárgehit pedagogalaš čovdosiid, earret eará mo árbevirolaš sámemusihka sáhttá oahpahit buot ahkejoavkkuide. Sámi vuođđoskuvlaoahpaheaddjeoahpu studeantta Ellen Inga Sara lea duhtavaš go musihkkaoahpus beasai oahppat olu sámi musihka birra ja movt musihkain bargat.  

- Mis lea leamaš hui somá. Mii leat lávlon ja juoigan, oahppan movt jiena geavahit, čuojahan čuojanasaiguin ja oahppan movt studios ráhkadit musihka. Mis lea maid leamaš ráppen bargobádji Ailo Vallin. Mun lean oahppan olu maid háliidan váldit mielde bargodillái ja lean dál juo álgán jurddašit movt sáhtán geavahit dán oahpahandilálašvuođas, muitala Sara.   

Musihkkavahkku lei oassin mánáidgárdeoahpaheaddjeoahpus, vuođđoskuvlaoahpaheaddjeoahpus ja sámegieloahpus. Dáinna lei Ellen Inga hui duhtavaš go beasai oahpásmuvvat mielstudeanttaiguin eará fágasuorggis.   

- Mun lean duođaid beassan oahpásmuvvat ja suohtastallat mielstudeanttaiguin. Dát lea maid leamaš hui buorre juste oahppobirrasa ja studeanttabirrasa nammii, loahpaha Ellen Inga Sara.  

Sámi musihkkaakademiija álggahuvvui 2018:s mii lea ovttasbargoprošeakta gaskal Sámi allaskuvlla, Sámi oahpahusguovddáža Suomas ja Ohcejoga gieldda. Prošeavtta ruhtadit Interreg Davvi Sápmi, Lappi Lihttu, Sámi allaskuvla, Davvekalohttaráđđi ja Ohcejoga gielda.