Vállje oahpuid maid don háliidat ja geavat áiggi nu go don háliidat!

Čoakke alccat 180 oahppočuoggá: 

• Unnimusat 90 oahppočuoggá čiekŋudeapmi ovtta fágasuorggis.
• Unnimusat 30 oahppočuoggá nuppi fágasuorggis.
• Unnimusat 10 oahppočuoggásaš smávva dutkanbarggu.
• 50 oahppočuoggá válljet friddja.

Oza ja oaččo dohkkehuvvot oahpuid. 

Mii lea friddja bachelor? 

Friddja bachelor lea bachelorgráda (180 oahppočuoggá), mas lea čiekŋudeapmi (90 oahppočuoggá) ovtta fágasuorggis, omd sámegiella ja sámi girjjálašvuođas, sámi journalisthkas, duodji ja hábmemis, boazodoalus. Eará oahppoásahusa oahput sáhttet nai dohkkehuvvot oassin Sámi allaskuvlla friddja bacheloras.  

Manne friddja bachelorgráda? 

• Bargoohcamii lea dus alitoahpu duođaštus
• Sáhtát masterohppui ohcat

Oza dákko: Friddja bachelorgráda ohcanskovi

Čuovvovaš bealit leat mielde friddja bachelora ohcama árvvoštallamis: 

• Gráda ferte deavdit gáibádusaid Sámi allaskuvlla bachelorgráda láhkaásahusa § 3 b) vuolde; ahte unnimustá 90 oahppočuoggá čiekŋudeapmi ovtta fágasuorggi siskkobealde, ja unnimustá 30 oahppočuoggá nuppi fágasuorggis. Gáibiduvvo ahte studeanta čađaha ovtta iešheanálaš barggu man viidodat leat 10 oahppočuoggá.
• Dan 90 oahppočuoggá čiekŋudeamis ferte leat unnimusat 20 oahppočuoggá čiekŋudandási oahput (200- dahje 2000- dási oahput).
• Buot oahppoovttadagat galget leat bachelordásis
• Unnimusat 60 oahppočuoggá grádas galget leat čađahuvvon Sámi allaskuvllas (gč. Sámi allaskuvlla bachelorgráda láhkaásahusa § 7)
• Unnimusat 60 oahppočuoggá grádas eai galgga leat oassin eará grádain maid leat olahan (gč. Sámi allaskuvlla bachelorgráda láhkaásahusa § 7)
• Grádas ii galgga leat fágalaš látnjalasvuohta eanet go 10 oahppočuoggá (gč. Sámi allaskuvlla bachelorgráda láhkaásahusa § 6).

Váldde oktavuođa oahppohálddahusain jus leat gažaldagat friddja bachelora birra.