Sámi allaskuvlla rektor Jelena Porsanger ja Sámi oahpahusguovddáža ovddidanhoavda Janne Näkkäläjärvi 8. UArctic Rectors Forumis Islánddas.

Geassemánnu 03. beaivi 2014

Sámi allaskuvla Islánddas

Sámi allaskuvlla rektor Jelena Porsanger lei rektorforumis Islánddas, Akureyri universitehtas 29.-30.5
​Árktalaš universitehta (UArctic) doallá jahkásaččat rektorforumiid.

 
Rektorat ságastalle: gávdnogo davveguovlluin sierra davvevuohki čađahit oahpahusa ja dáhkidit buori oahppama. Sámi allaskuvla rektor oaivvilda ahte dat gávdno ja váldá ovdamearkan allaskuvlla geabbilis johttioahpahusa:

  • Sámi allaskuvla lea hábmen johttioahpahusmodealla boazovácciide. Dat oahpahus attii boazobargiide vejolašvuođa váldit oahpu go sii barge bohccuiguin. Dál Sámi allaskuvla lea heiveheamen dan oahpahusmodealla guolásteddjiid várás sámi riddoguovlluin.

Lea allaskuvlabargi Máhtte Bongo guhte hábmii dan oahpahusvuogi. Dat gáibida lagas ovttasbarggu árbevirolaš ealáhusain. Allaskuvla oaččui oahpahusbálkkašumi dan oahpu ovddas 2010s. Máŋgalogi studeantta válde dan johttioahpu ja ožžo buriid árvosániid.

  • Johtti oahpahus lea Sámi allaskuvla “davvevuohki” buktit oahpu lagabui sin geat barget árbevirolaš ealáhusaiguin, boazodoaluin dahje mearraguolástemiin.

Rektorforum almmuhii Julggaštusa dán jagáš fáttás “University Educaton in the Arctic Regions: Flexibility, Gender Equality and Health” . 
Studeanttat maiddái hábmejedje iežaset studeantajulggaštusa.

Rektorforumiin ledjet maiddái sierra čoahkkaneamit studeanttaid várás.
Allaskuvlla studeanta lei movttet oahpásnuvvat eará árktalaš universitehtaid ja allaskuvllaid studeanttaide.


Sámi allaskuvlla beales lei praktihkalaš pedagogihkkaoahpu (PPO) studeanta Kirsi Paltto studeantaforumis Islánddas, dá Hokkaido University studeanttain Naoki Kumano bálddas.

Loga eambbo dás (engelasgillii).