Trond Trosterud (UiT Norgga árktalaš universitehta)

Sámi leksikográfalaš guovddáš sámi leksikográfalaš árbevieru perspektiivvas

UiT lea huksemin Sámi leksikográfalaš guovddáža, man ulbmilin lea čállit ovttagielat sámegiela sátnegirjjiid, sátnegirjjiid eanetlogugielaid ja sámegielaid gaskkas, sátnegirjjiid sámegielaid gaskkas ja hukset dálá servodaga terminologiija. Sámi leksikografiija historjjá lea measta 300 jagi boaris, ja danin lea ávkkálaš gieđahallat mo otná beaivvi leksikográfalaš bargu spiehkasta ovddeš barggus, ja man dihte. Konrad Nielsena sátnegirjebargu lea davvisámegiela leksikografiija vuođđun – dieđusge su sátnegirjjiid viidodaga ja kvaliteahta dihte, muhto kánske maid dan dihte, ahte su sátnegirjjit spiehkastit sihke báhpaid geavatlaš sátnegirjjiin ahte fennougristtaid dieđalaš sátnegirjjiin. Erohus boahtá ovdan, go buohtastahttá su 1913-sátnegirjji ja su stuorra sátnegirjji (1932-1962). 1913-sátnegirji lei oassi fennougristtalaš dutkanprošeavttas, man ulbmilin lei dutkat sámegielaid ja urálalaš gielaid vuođđogiela. 1932-1962-sátnegirji lei fas eanet sosiálaantropologalaš sátnegirji, man ulbmilin lei govvet sámi kultuvrra  giela bokte. Boađus lei justa dan dihte dárkilis govva davvisámegielas.

Logaldallamis mun ovdanbuvttán UiT leksikográfalaš plánaid ja čájehan, mo dat doaladuvvet sámi leksikográfalaš árbevirrui, ja makkár rolla Konrad Nielsenis lea leamašan dan árbevierus.