Mii lea studeantaáittardeaddji?

Studeantaáittardeaddji

• lea sorjjásmeahttun veahkki mii galgá doarjut studeanttaid riektesihkarvuođa
• rávve ja veahkeha Sámi allaskuvlla studeanttaid áššiin mat gusket sin oahppodilálašvuhtii
• galgá bearráigeahččat ahte áššit ožžot dohkálaš ja rievttes gieđahallama, ja ahte studeanttaid vuoigatvuođat váldojuvvojit vuhtii
• lea nuvttá fálaldat Sámi allaskuvlla studeanttaide.

Váldde oktavuođa studeantaáittardeddjiin

Jus studeanttain lea dárbu hupmat studeantaáittardeddjiin, de váldde oktavuođa sudnuin šiehttat áiggi:

Studeantaáittardeaddjit: Erlend Berntsen ja Ingvild Lorentzen

E-boasta: studentombudet@uit.no  / Tlf: +47 77644646 

• Sámi allaskuvllas lea ovttasbargu UiT Norgga árktalaš universitehtain studeantaáittardeaddji doaimma ektui, ja studeantaáittardeaddjit barget beaivválaččat Romssas.
• Sudnos lea jávohisgeatnegasvuohta.
• Studeantaáittardeddjjiin ferte gulahallat juogo dárogillii dahje eaŋgalasgillii.
• Studeantaáittardeaddjit eai leat Sámi allaskuvlla bargit, muhto rapporterejit Sámi allaskuvlla stivrii.
• Soai eaba oaččo dokumeanttaid Sámi allaskuvllas, nu ahte beassaba dušše geahččat dokumeanttaid maid studeanttat ieža juogadit sudnuin.

Mainna sáhttá veahkehit?

Studeantaáittardeaddji sáhttá:

• Guldalit du vuorjašumiid ja rávvet váttes dilálašvuođain.
• Veahkkin identifiseret váttisvuođa ja evttohit movt ja gosa ovddidit ášši.
• Iskat čuovvu go Sámi allaskuvla gustovaš lágaid ja njuolggadusaid.
• Leat mielde čoavdime ášši nu vuollegis dásis go vejolaš.
• Leat bealátkeahtes olggobealeolmmoš jus čuožžila soahpameahttunvuohta studeanta ja Sámi allaskuvlla gaskkas.
• Čilget studeanttaid vuoigatvuođaid ja geatnegasvuođaid.

Studeantaáittardeaddji ii sáhte:

• Váldit beali áššis, mearridit áššiid dahje doaibmat studeanta advokáhttan.
• Bagadit dahje instrueret Sámi allaskuvlla dahje dan mearridanorgánaid.
• Meannudit váidagiid dahje leat guoddalanorgána Sámi allaskuvlla mearrádusaide.

Ovdamearkkat áššiin main studeanttat sáhttet bivdit veahki studeantaáittardeaddjis:

• Jus studeanta lea Sámi allaskuvllas ožžon mearrádusa, ja eahpida ahte mearrádus lea dahkkon riekta. Studeantaáittardeaddji sáhttá veahkkin dutnje árvvoštallat orru go mearrádus dahkkon njuolggadusaid mielde.
• Sáhttá veahkkin čállit váidaga. Studeantaáittardeaddji ii sáhte studeanta ovddas čállit, ii ge váidit mearrádusaid.
• Ságastallanguoibmi jus studeanta lea duhtatmeahttun juoga mainna. Studeantaáittardeaddji sáhttá veahkkin identifiseret ášši dahje čuolmma, ja veahkkin gávdnat rievttes áššegeainnu ovddidit ášši.
• Veahkehit ja rávvet jus háliidat dieđihit spiehkastemiid, givssiheami dahje loavkašuhttima birra.
• Jus studeanta lea bovdejuvvon ságastallamii omd. dieđiheami, dohkálašvuođaeahpádusa dahje eksámenverrošeami birra, ja háliida bealákeahttes observatevrra mielde čoahkkimii.

Jahkeraporttat

Dokument

Studeantaáittardeaddji jahkeraporta 2024 (486.31 KB)

Dokument

Studeantaáittardeaddji jahkeraporta 2021-2023 (585.54 KB)

Sámi allaskuvlla studeantaáittardeaddji mandáhtta 

1. Láhkavuođđu 

Studeantaáittardeaddji mandáhtta lea dahkkon universitehta- ja allaskuvlalága § 10-8 olis. 

2. Ulbmil 

Studeantaáittardeaddji galgá veahkkin oadjudit ásahusa studeanttaid riektesihkarvuođa.    

3. Ovddasvástádus ja barggut

Studeantaáittardeaddji galgá rávvet ja veahkehit studeanttaid áššiin mat gusket sin oahppodilálašvuhtii, ja váikkuhit dasa ahte ásahus meannuda áššiid dohkálaččat ja riekta.   

Vuhtiiváldin dihte studeanttaid rivttiid, sáhttá studeantaáittardeaddji gieđahallat áššiid go studeanta dahje bargi lea váldán oktavuođa, dahje iežas vuolggaheami bokte. 

Studeantaáittardeaddji sáhttá oassálastit ja ovddidit diehtojuohkináššiid buot ásahusa orgánaid čoahkkimiidda.

Studeantaáittardeaddji mearrida ieš loahpalaččat galgá go studeantaáittardeaddji bargagoahtit áššiin. Jus veahki jearran hilgojuvvo almmá čujuheami haga earáide, de galgá studeantaáittardeaddji ákkastallat hilgunmearrádusa.    

4. Raporteren 

Studeantaáittardeaddji addá jahkásaččat raportta iežas doaimma birra ásahusa stivrii. Rektorii berre dađistaga dieđihit earenoamáš duođalaš dahje prinsihpalaš áššiid birra.

5. Jávohisvuođageasku 

Studeantaáittardeaddjis lea jávohisvuođageasku hálddašanlága §§ 13 – 13 e njuolggadusaid mielde. Studeantaáittardeaddji jávohisvuođageasku lea čadnon áittardanrollii, ja boahtá bargi searvangeatnegasvuođa ovddabeallai. 

6. Sorjjasmeahttunvuohta 

Studeantaáittardeaddji virgáduvvo sierra sorjjasmeahttun virgái, ja su doaimma ii sáhte instrueret.  

Stivra virgáda studeantaáittardeaddji ja stivra ieš mearrida áittardeaddji mandáhta.