Sensor dahje fágaoahpaheaddji sáhttá leat bealálaš sensureret eksámena dahje dohkkehit geatnegahtton bargguid jus lea dakkár relašuvdna gaskkal sensora / fágaoahpaheaddji ja kandidáhta, go lea čilgejuvvon Hálddašanlága § 6. 

Čálalaš eksámeniin lea kandidáhta identitehta dábálaččat čiegus, muhto njálmmálaš ja praktihkalaš eksámeniin, masterbarggus dahje eará earenoamáš diliin sáhttá sensor diehtit kandidáhta identitehta.  

• Bealálašvuođa oktavuođas lea dábálaččat liigesensora gii árvvoštallá dán kandidáhta eksámena, dahje eará fágaoahpaheaddji guhte árvvoštallá dán studeanta geatnegahtton bargguid.

Dieđihit bealálašvuođa:

• Sihke sensor, fágaoahpaheaddji ja kandidáhtta sáhttet dieđihit oahppohálddahussii beliid mat sáhttet dagahit bealátkeahtesvuođa luohttevašvuođa ovdii.
• Jus sensor, fágaoahpaheaddji dahje kandidáhtta diehtá ahte sus ja muhtin kandidáhta/sensora/fágaoahpaheaddji gaskkas lea gaskavuohta mii sáhttá váikkuhit bealátkeahtesvuođa luohttámuššii, de dieđiha farggamusat oahppohálddahussii dan birra: oahppohalddahus@samas.no
• Jus dát fuomášuvvo eksámenbeaivvi, de dieđihat dán birra eksámena ovddasvástideaddjái ovttatmano.

Goas lea sensor/fágaoahpaheaddji bealálaš?

• Ii šatta bealálaš dušše dainna jus lea dábálaš ustit, oahpis dahje bargoguoibmi.
• Galgá leat nu lagas oktavuohta sensora/fágaoahpaheaddji ja studeanta gaskkas ahte sáhttá dagahit bealátkeahtesvuođa ovdii.
• Galgá ee. deattuhuvvot sáhttá go árvvoštallan mearkkašit erenoamáš ovdamuni, vahága dahje hehttehusa sensorii/fágaoahpaheaddjái dahje earáide geaidda sus lea lagas persovnnalaš čanastat.

Hálddašanlága § 6 mielde lea fágaoahpaheaddji/sensor álo bealálaš árvvoštallat studeanta guhte: 

• lea váhnen, mánná, áhkku, áddjá, oabbá, vieljja sutnje dahje su náittosguoibmái.
• lea su biebmováhnen, biebmománná, váldeguoddi (verge), válddálaš (fullmektig)
• lea dahje lea leamaš su náittosguoibmi dahje lohpádallan guoibmi

Eará čanastagat mat sáhttet dagahit bealákeahttesvuođa ovdii, muhto mat eai automáhtalaččat daga dan: 

• Eará lagas bearaščanastat dahje lagas ustit
• Ráhkisvuođarelašuvdna
• Jus lea leamaš guhkes ja lagas ovttasbargu studeanttain dahje jus lea leamaš su bagadallin
• Riiddut

Váldonjuolggadus lea ahte sensor/fágaoahpaheaddji ieš mearrida lea go son bealálaš, muhto

• dát ii goitge leat loahpalaš ja geatnegahtti mearrádus
• jus boahtá bealálašvuođačuoččuhus, de sáhttá jođiheaddji dahje bajitdási orgána árvvoštallat mearrádusa.