Kaisa Rautio Helander (Sámi allaskuvla)

Konrad Nielsen Norgga eiseválddiid nammakonsuleantan

Ii dáidde leat máŋgasii nu oahpes ášši, ahte Konrad Nielsen lea dutkan sámi báikenamaid ja ahte son lea maiddái bargan Norgga guovddáš eiseválddiid báikenammakonsuleantan, erenoamážit kártadoaimmahaga sámegiela áššedovdin. Dan bargui son nammaduvvui jagi 1911 mannjel go ovddit báikenammakonsuleanta, Just Knud Qvigstad, lei nammaduvvon girko- ja oahpahusministtarin jagi 1910.  

Sáhkavuorustan guorahalan Nielsena rolla báikenammakonsuleantan dan áigge go sámi báikenamaid virggálaš atnu stivrejuvvui sakka dáruiduhttinpolitihka ulbmiliid mielde. Čájehan maiddái ovdamearkkaid mainna lágiin son gieđahalai kártabargguid oktavuođas sámi báikenamaid ja makkár vugiiguin sámi namat dáruiduhttojuvvojedje su konsuleantaáiggis. Gidden dán sáhkavuorus fuomášumi maiddái sámi báikenamaid čállinvuohkái, daningo 1900-logu álggus lei Friisa čállinvuohki ain anus iige Konrad Nielsena dieđalaš čállinvuohki lean vel almmustuvvan.