Odne vuolláičálle Sámi allaskuvla ja Guovdageainnu suohkan ovttasbargošiehtadusa mainna áigot nannet ovttasbarggu. 

– Lea dehálaš nannet gulahallama ja ovttasbarggu Guovdageainnu suohkaniin, ja maiddái geahčadit mo báikkálaš dásis sáhttá oažžut buoret fálaldagaid suohkanis studeanttaide ja bargiide, dadjá rektor Liv Inger Somby.

Sátnejođiheaddji Sámmol Ánte, Anders S. Buljo deattuha dehálašvuođa dahkat suohkana geasuheaddjin sihke studeanttaide ja bargiide, ja fállagoahtit buriid fálaldagaid ja ássanbirrasa. 

– Dáinna ovttasbargguin de ovdánahttit geasuheaddji oahpuid mat heivehuvvojit sihke Guovdageainnu suohkana ja eará sámi suohkaniid bálvalussurggiide ja dárbbuide, nugo dearvvašvuođa-, oahpahus- ja boazodoallu, dadjá sátnejođiheaddji Anders S. Buljo.

Sihke Buljo ja Somby leaba vuoruhan šiehtadussii mo ovttas sáhttit ovdánahttit geasuheaddji oahpuid mat heivehuvvojit sihke báikkálaš ealáhusaid ja servodaga dárbbuide, erenomáš dievdoolbmuid gelbbolašvuođa ja gelbbolašvuođaloktema várás. 

Mihttun dáinna šiehtadusain lea váldit oktasaš ovddasvástádusa nannet ja ovdánahttit sámegiela, kultuvrra ja servodatovdáneami. Dáinna ovttasbargguin lea mihttun ovdánahttit ja doalahit sámi gelbbolašvuođa guovddáš sámi guovllus. 

Šiehtadusa ulbmil lea:

• nannet gulahallama ja ovttasbarggu gaskkal Sámi allaskuvlla ja Guovdageainnu suohkana
• ovttasbargguin nannet Guovdageainnu geasuheaddji báikin 
• ovttasbargguin nannet studeanttaide ja bargiide buriid fálaldagaid suohkana dásis
• ovttasbargguin geasuhit sihke suohkana ássiid, studeanttaid ja SA bargiid lágidit oktasaš doaimmaid ja fálaldagaid
• ásahit fálaldagaid mat leat geasuheaddjin sihke ássiide, studeanttaide ja bargiide 
• nannet ovdánahttingelbbolašvuođa, sihke alitoahpuin, dutkamis ja innovašuvnna hárrái
• nannet sámegiela, kultuvrra ja servodaga
• ovdánahttit campusa (Diehtosiidda oahppo- ja bargobáikkiin)

Rektor dadjá ahte lei dehálaš šiehtadusas čalmmustahttit orrundilli váilevuođaid, sihke go váilot viessohuksensajit ja leat unnán viesut heivehuvvo bearrašiidda. Sámi allaskuvllas vásihat ahte sihke studeanttat ja bargit rahčet gávdnat ássanviesuid, ja dát sáhttá dagahit ahte olbmot eai datte fárre Guovdageidnui. Šiehtadus maid geatnegahttá buriid astoáigefálaldagaid bargiide ja studeanttaide.

Loga olles šiehtadusa dás.