Sámegiela ja sámi girjjálašvuođa masterprográmma, Sámi allaskuvllas lea hui bivnnut oahppu.  

– Leat duhtavaččat go 18is háliidit lohkat sámegiela masterdásis ja muđui leat 47 ohcci bachelor dási ja eará giellafágaide, dadjá goahtejođiheaddji Risten Lansman.

Ohcciidlogut 2026 čavčča oahpuide čájehit ahte Sámegiela ja sámi girjjálašvuođa masteroahppu lea dán čavčča bivnnuheamos oahppoprográmma Sámi allaskuvllas. Vaikko oppalaš ohcciidlohku lea njiedjan dan geažil go bacheloroahput eai álggahuvvo dán čavčča, de lea dán fágasuorgái nana beroštupmi.

Váldoohcanáigemearri bachelor- ja masteroahpuide lei cuoŋománu 15. beaivvi. Máhttodepartemeantta raporta čájeha ahte riikkadásis lea ohcciidlohku lassánan 6 proseanttain. Sámi allaskuvllas leat dán jagi almmuhuvvon beali unnit oahput go diibmá, mii váikkuha oppalaš ohcciidloguide, muhto bivnnuheamos oahpuid ektui leat logut positiivvat.

Sámegiella ain njunnošis

Sámegiela ja sámi girjjálašvuođa masteroahppu lea loktanan oahppun masa leat eanemus ohccit dán jagi sisaváldimis. Dat čájeha ahte lea nanu fágalaš beroštupmi sámegillii ja girjjálašvuhtii.   

Lea maiddái stuorra beroštupmi lohkat sámegiela easkaálgi dásis, nugo gohčoduvvon SAAL oahpuid ja eaŋkil fágaid bachelordásis.

• SÁM1 ja SÁM 2: 107 ohcci 
• Ovttaskas oahput bachelor dásis: 51 ohcci 
• Mastergráda sámegielas ja sámi girjjálašvuođas: 16 ohcci 
• Dulkaoahppu, julevsámegiella - dárogiella: 3 ohcci 
• Dulkaoahppu, lullisámegiella - dárogiella: 4 ohcci