Dihtetgo ahte go studeret Sámi allaskuvllas de leat dus máŋga vejolašvuođa oažžut stipeandda dahje eará ruđalaš doarjaga?

Makkár ortnegat heivejit dutnje, lea dan duohken gos leat eret ja maid studeret. Dán artihkkalis gávnnat dieđuid makkár doarjjaortnegat sáhttet heivet dutnje. 

Loatna ja stipeanda Norgga loatnakássas (Lånekassa)

Máŋgga Norgga bealde studeanttaide lea dát deháleamos ruhtagáldu oahppoáigodagas. Doppe sáhtát ohcat loana ja stipeandda alit ohppui. 

Loatnakássas lea maid ortnet mii rahpá vejolašvuođa ahte studeanttat geat eai leat Norgga stáhtaborgárat sáhttet oažžut doarjaga. 

Dus sáhttá leat vuoigatvuohta doarjagii jus dus lea:

• bistevaš orrunlohpi Norggas
• isit/ eamit gii lea Norgga stáhtaborgár
• bearašlahttu gii lea EØS-riikka stáhtaborgár ja orru Norggas
• bistevaš orrunvuoigatvuohta EØS-riikka stáhtaborgára bearašlahttun

Čakčalohkanbaji ohcanáigemearri lea skábmamánu 15. beaivvi, muhto lea buoremus ohcat nu árrat go vejolaš. Loatnakássii sáhtát sáddet ohcamuša juo ovdal go leat registrerejuvvon studeantan.

Muitte máksit lohkanbadjedivada ja registreret iežat studeantan. Stipeanda ja loatna máksojuvvojit automáhtalaččat go leat máksán lohkanbadjedivada ja registrerejuvvon studeantan.

Dárkkis Loatnakássa neahttasiiddus makkár njuolggadusat ja eavttut gustojit dutnje.

Stipeanda Norgga Sámedikkis

Jus leat Sámi allaskuvlla studeanta, de sáhtát maid ohcat stipeandda Sámedikkis. Stipeandaortnegat gusket studeanttaide dihto oahpuin ja fágasurggiin.

Sáhtát ohcat stipeandda jus:

• Válddát sámi mánáidgárdde-, vuođđoskuvlaoahpaheaddjeoahpu dahje praktihkalaš-pedagogalaš oahpu
• Válddát sámi buohccidivššároahpu, ja leat álbmotregistrerejuvvon Norggas.
• Leat gullevaš márkosámi guvlui, álbmotregistrerejuvvon Norggas ja válddát sámegieloahpu alit dásis
• Sáhtát duođaštit oahpposaji sámi dulkaoahpus, ja leat álbmotregistrerejuvvon Norggas
• Logat masteroahpu davvisámegielas vuosttašgiellan

Dasa lassin sáhtát ohcat duodjestipeandda jus leat Norgga bealde studeanta ja válddat bachelora dahje mastera duojis ollesáiggis dahje oasseáiggis. Link: 

Márkosámi guovllu studeanttaide gustojit sierra geográfalaš eavttut. Dan dihte berret iskat Sámedikki neahttasiidduin leatgo du ruovttugielddat mielde dan ortnegis.

Muitte maiddái iskat makkár eavttut gusket dan stipendii maid háliidat ohcat, ja makkár ohcanáigemearri lea.

Áigemearit ohcat stipeandda alit dási ohppui leat golggotmánu 1. b čakčalohkanbajis ja guovvamánu 1. b giđđalohkanbajis. Fuomáš ahte duodjestipeanddas lea eará áigemearri. 

Ruoŧa dahje Suoma beale studeanta?

Studeanttat geat váldet oahpu olgoriikkas, ožžot dábálaččat oahppodoarjaga iežaset ruovtturiikka ortnegiid bokte.

Ruoŧa studeanttat sáhttet ohcat doarjaga Centrala studiestödsnämnden (CSN).

Doppe sáhtát ohcat sihke stipeandda (bidrag) ja loana. Ruoŧas máksojuvvo seamma olu beroškeahttá studeret go Ruoŧas vai olgoriikkas. Olgoriikastudeanttain lea vejolašvuohta ohcat liigedoarjaga alladeabbu eallingoluid dihte (merkostnadslån för utlandsstudier)

Iskka CSN neahttasiiddus makkár doarjjaortnegiid dus lea riekti oažžut, man ollu sáhtát oažžut ja makkár eavttut gusket dutnje.

Suoma studeanttat sáhttet ohca doarjaga Kelas.  Kela oahppodoarjagat leat stipeanddat, stáhtadáhkádus oahppodoarjagii ja orrundoarjja studeanttaide. 

Go studere olgoriikkas, de sáhtát oažžut seamma stipeandda go maid studeanttat ožžot Suomas seamma dásis. 

Jus galggat oažžut doarjaga ohppui maid válddát olgoriikkas, de fertet váldit oahpu ollesáiggis ja oahppu ferte leat dakkár mii livčče addán vuoigatvuođa oahppodoarjagii jus livččet váldán oahpu Suomas.  Olgoriikastudeantan sáhtát maid oažžut stáhtadáhkádusa oahppodoarjagii. Dáhkádus lea 1000 euro juohke mánu. 

Iskka Kela neahttasiiddus makkár doarjjaortnegiid dus lea riekti oažžut, man ollu sáhtát oažžut ja makkár eavttut gusket dutnje. https://www.kela.fi/opinnot-ulkomailla

Jus dárbbašat oahpposajiduođaštusa ohcamii, váldde oktavuođa oahppohálddahusain.

Geavat moadde minuhta iskat vejolašvuođaid 

Sáhttá leat nu ahte gávdnojit doarjjaortnegat maidda dus lea riekti, muhto don it dieđe dan. Danne sáhttá leat ávkkálaš iskat makkár ortnegat gusket juste du ohppui ja du dillái. Lea erenomáš dehálaš muitit ohcat ohcanáigemeari siskkobealde.