Govva: Ville Rinne / Lappi universitehta

Sámi allaskuvlla prorektor Sámmol Valkeapää lea nammaduvvon Lappi universitehta ”Dán jagaš alumnin”. Valkeapää čađahii iežas mastergráda Lappi universitehta dáidaga ja designa fakultehtas. 

Lappi universitehta nammadanjoavku čilge su ná: Sámmol Valkeapää lea leamaš mearkkašahtti oassin Lappi universiteahta ja Sámi allaskuvlla dutkan-, oahpahus- ja ovddidanovttasbarggus, earenoamážit oktasaš prošeavttaid ovddideamis, mat laktásit sámi kulturárbái, sámi duodjái ja mediadutkamii. Su bargu lea ožžon sámi máhtolašvuođa, dáidaga ja duoji eambbo oidnosii. Valkeapää lea erenoamáš čeahpes alumni gii bures ovttastahttá dáiddalaš čehppodaga, searvevuođa ja čiekŋalis máhtu sámi servodagas. Son hukse maid šaldiid sámi servodaga, universitehta ja dáidaga gaskii.