Odne almmuhuvvui illudahtti ođas gonagasviesus.  Gonagaslaš majestehta Gonagas Harald lea nammadan doseanta Jan Henry Keskitalo St. Olav ávvomearkka 1. luohká Riddárin.

Keskitalo lei Sámi allaskuvllas vuosttaš rektor ja  sutnje geigejuvvo ánsu dehálaš barggu ovddas maid lea bargan sihke sámi ja eamiálbmot oahpuid nannemis ja vuoruheamis. 

– Dát lei duođaid illudahtti sáhka! Sámi allaskuvllas leat erenoamáš rámis dáinna ođđasiin,  ja leat giitevaččat buot daid bargguid ovddas maid Jan Henry Keskitalo lea bargan máŋgalogi jagi.  Son lei Sámi allaskuvlla vuosttaš rektor ja láidesteaddji máŋga logi jagi. Keskitalo barggus leat buorit bohtosat, go son bijai Sámi allaskuvlii buori fágalašvuođu – ja son gal duođaid ánssáša 1. luohká Riddár ánssu, dadjá rektor Liv Inger Somby.

Ávvodoalut leat Diehtosiiddas, Sámi allaskuvllas, bearjadaga,  cuoŋománu 10. beaivvi.