Sámi dáidda dárbbaša nannoseabbo kuráhtorgelbbolašvuođa

Sii geat dulkojit, kuraterejit ja gaskkustit sámi dáidaga leat sii guđet hábmejit makkár muitalusat ja perspektiivvat buktojuvvojit oidnosii, ja gii daid beassá meroštallat.
2027 rájes fállá Sámi allaskuvla áibbas ođđa kurssa, Sámi Curatorship, mii lea huksejuvvon ovttas dáiddárfierpmádagain Dáiddadáluin. 

Oahppu galgá addit eanet gelbbolašvuođa sámi ja álgoálbmot dáidagis, duojis ja kuratoralaš praksisas mas vuolggasadjin leat álgoálbmot perspektiivvat ja árvvut.

– Mii ovddidit fálaldaga mii duhtada sámi- ja álgoálbmotservodaga dárbbuid. Danne lea dát kursa relevánta sidjiide geat barget dujiin, dáidagiin ja kultuvrrain. Dát guoská erenoamážit sidjiide geat barget sámi ja álgoálbmot-vuođđuduvvon duoji ja dáidaga gaskkustemiin, muhto maiddái sidjiide geat barget kulturgaskkustemiin ja -buvttademiin, nu go ovdamearkka dihte filmmain-, teáhteriin- ja festiválaiguin, dadjá Ingá Elisa Påve Idivuoma, Sámi Allaskuvlla lektor duojis.
 

Guhkesáiggi áŋgiruššan hukset sámi fágalaš gelbbolašvuođa

Dáiddadállu lea bálkáhan professor Harald Gaski jođihit fágalaš ovdánahttinbarggu dáiddárfierpmádaga ovddas, ovttasbarggus Sámi
allaskuvllain. Dát álgu galgá sihkkarastit ahte fálaldat lea nannosit vuođđuduvvon sámi- ja álgoálbmotperspektiivvaide, árbevieruide, ja dáiddalaš geavadagaide.

Oahppu vuolggasadji lea sámi máhttoáddejupmi ja álgoálbmotvuđot metodologiijaide, ja addá studeanttaide vejolašvuođa oaidnit dálááiggi dáidaga, dáiddalaš geavadagaid, ja movt iešguđetlágan vugiiguin lahkona sámi ja álgoálbmotdáidaga kurateremii ja gaskkusteapmái.

Kursa lea ráhkaduvvon Birgejupmi-prošeavttas, mii lea ruhtaduvvon EU Horizon bokte, mas sihke Sámi allaskuvla ja Dáiddadállu leat leamaš mielde. Prošeavttas leat ásahusat ovttasbargan ovddidit ođđa máhtu, nannet fágabirrasiid ja ásahit ođđa oahppofálaldagaid sámi dáidda- ja kultursuorggis. Ođđa kursa lea dán ovttasbarggu konkrehta boađus.
 

Ohcanáigemearri lea juovlamánu 1. beaivvi, 2026, eambbo dieđuid gávnnat dás.