Artihkal “Assimilation of Indigenous Nomadic Pastoralist Knowledge in the Public Governance of Sámi Reindeer Husbandry” lea dál almmuhuvvon riikkaidgaskasaš dieđalaš áigečállagis Pastoralism: Research, Policy and Practice.

Artihkal čájeha movt dáruiduhttin ja stáhtalaš reforpmat leat guhkes áiggi váikkuhan sámi boazoealáhussii, ii dušše giela ja kultuvrra dáfus, muhto maiddái hálddašeami, oahpahusa ja árbevirolaš oahppanarenáid massima bokte.

Dutkit čájehit ahte stáhtalaš reguleremat 1970-logus bidje johtui standardiserejuvvon buvttadan- ja stivrenvuogádagaid, mat unnán vuhtiiválde sámi siidaorganiserema, nomádalaš máhtu ja árbevirolaš mearridanproseassaid.

Artihkal lokte maid ahte assimileren ain dáhpáhuvvá odne hálddašanvuogádagaid bokte, earret eará go sámegiella, báikenamat ja boazodoallofágalaš doahpagat jorgaluvvojit hálddahuslaš kategoriijaide mat eai čilge sámi ipmárdusa luonddu, johtima ja bistevašvuođa birra.

Dehálaš fáddán artihkkalis lea maid movt nissonolbmuid ja bearraša vuoigatvuođat boazoealáhusas headjuduvvojedje láhkarievdadusaid bokte, earenoamážit 1978 Boazodoallolága oktavuođas.

– Duohta seanadeapmi gáibida ahte sámegiella, boazodoallomáhttu ja siidavuođđuduvvon hálddašanvuogit fas dohkkehuvvojit vuođđun bistevaš sámi boazoealáhussii Árktisas, lohká professor Svein Disch Mathiesen.

Dás sáhtát lohkat artihkkala.