Sámi allaskuvllas illudit go Nils Øivind lea ožžon davviriikalaš Gollegiella-bálkkašumi! Son lea bargan áŋgirit sámegiela ovdii máŋgalogi jagi, mas sihke ovddeš studeanttat, dálá studeanttat ja boahttevaš buolvvat sámi servodagas ožžot ávkki. 

Nils Øivind lea bargan sámegiela lingvisttalaš surggiin ja daidda buktán ođđa diehtaga, ja dáin surggiin oahpahan studeanttaid mat fas dolvot dieđu ja diehtaga viidáseappot. Dasa lassin son maiddái lea ollu ja guhkes áiggi bargan sámegielat mánáid ja nuoraid sámegieloahpahusa ovddidit, earret eará giellaoahpahusa ja giellaoahpahusvugiid ovddideami bokte.

 Dát boahtá nuorat buolvvaide ja olles servodahkii buorrin, go Nils Øivind lea áŋgirit oahpahan sihke mánáidgárddiid ja skuvllaid oahpaheaddjestudeanttaid giellaoahppama ja lohkanoahpahusa birra, man bokte sii fas bastet sámegiela oahpahit sámegiella vuođđun.

–  Dát lea illu sáhka Sámi allaskuvlii, ahte min ovddeš giellačeahppi ja professor Máre Jon Nilsa, Nils Øivind Helander oažžu dán bálkkašumi. Nils Øivind lea bargan mearehis buori barggu Sámi allaskuvllas.  Son lei čeahpes, movttegis ja dárkilis giellalogaldalli ja studeanttaide lei ávkin su fágalaš attáldat.  Su dutkanbarggut leat ávkin ja leat dehálaš vuođđun ja gáldun. Mii illudat Sámi allaskuvllas, ja cealkit ollu lihkusávaldagaid Nils Øivind ja olles bearrašii, dadjá rektor Liv Inger Somby.