Oza ofelažžan!

Háliidat go diehtit eambbo sámi kultuvrra ja servodateallima birra? Liikot go mátkkoštit ja deaivvadit eará olbmuiguin? Háliidat go muitalit sámiid birra eará nuoraide? Háliidat go hástalit iežat?

Jus vástidat juo, de lea ofelaš-bargu juste dutnje! Mii sávvat dutnje bures boahtima ohccin. Mii ávžžuhit erenoamážit bártniid ohcat.

Ohcanskovvi rahpo guovvamánu 1. beaivve juohke jagi. Sádde ohcamuša ovdal cuoŋománu 15. beaivve. Bija dáid dokumeanttaid mielddusin:
CV, duođaštuvvon kopiija skuvladuođaštusas dahje árvosátnelisttu maŋimus jahkebealis, golbma referánssa ja vejolaš bargoduođaštusaid. Referánssat sáhttet leat ovddeš bargoaddi, oahpaheaddji dahje muhtun gii dovdá du astoáiggedoaimmaid bokte, nugo du hárjeheaddji dahje jođiheaddji.

Don fertet leat olahan oppalaš lohkangelbbolašvuođa, dahje oažžut dan dán giđa. Sáhtát maiddái ohcat jus leat nuorat go 25 jagi sisaváldinjagi, ja dus lea unnimusat 5 jagi oahppo- ja/dahje bargovásáhus, mii mearkkaša reálagelbbolašvuohta beassat alit ohppui. Lassin leat barggut maid galggat dahkat ja ovdanbuktit jearahallama ja auditiona oktavuođas. It sáhte leat boarrásit go 25 jagi dan jagi go ozat.

Loga eambbo ja oza dás!