– Dát leat hui buorit logut, muhto mii eat leat vel juksan mihttomeari. Dál biddjojit barggut johtui sihke rekruteremiin ja gulahallamiin ohcciiguin. Mii diehtit bures makkár hástalusat sámi skuvllain ja mánáidgárddiin leat, go eai leat doarvái sámegielat oahpaheaddjit, dadjá rektor Liv Inger Somby. 

103 ohcci leat ohcan Sámi allaskuvlla oahpaheaddjeoahpuide Samordna opptak ja báikkálaš sisaváldima bokte. 

Allaskuvla fállá sámi mánáidgárdeoahpaheaddjeoahpuid bachelordásis, ja sámi vuođđoskuvlaoahpaheaddjeoahpuid 1.-7. luohkkái ja 5. -10. luohkkái mii lea masterdási oahppu. Čakčat álggahuvvo maid jahkebeallásaš joatkkaoahppu sámi praktihkalaš-pedagogalaš oahppu (SPPO ja sámi praktihkalaš-pedagogalaš oahppu fidnofágii (SPPO-F), mii lea joatkkaoahppu mii addá gelbbolašvuođa bargat oahpaheaddjin. 

Dá leat ohcciidlogut Samordna opptakas 2026 čavčča:

• Sámi vuođđoskuvlaoahpaheaddjeoahppu 5.-10. ceahki: 22 ohcci 
• Sámi vuođđoskuvlaoahpaheaddjeoahppu 1.-7. ceahki: 20 ohcci 
•  Sámi mánáidgárdeoahpaheaddjeoahppu, geabbilis prográmma: 5 ohcci 

Dá leat logut báikkálaš sisaváldimis 2026/2027: 

• Sámi praktihkalaš-pedagogalaš oahppu (SPPO): 27 ohcci 
•  Sámi praktihkalaš-pedagogalaš oahppu fidnofágaid várás (SPPO-F): 29 ohcci 

Sámi allaskuvlla sámi oahpaheaddjeoahpuin lea dehálaš servodatdoaibma. 

Oahput galget sihke gealbudit sámegielat oahpaheddjiid skuvlii ja mánáidgárdái, ja leat mielde nannemin sámi giela, kultuvrra ja servodaga. Sámi allaskuvllas oahpahuvvojit oahpaheaddjestudeanttat sámegielat fága- ja oahppobirrasis, ja oahput gealbudahttet oahpaheddjiid bargat sihke Norggas, Ruoŧas ja Suomas. 

– Mii leat hui duhtavaččat ohcciidloguin, ja lea movttiidahtti oaidnit ahte beroštupmi gazzat sámi oahpaheaddjeoahpu lassána. Mun rámidan Sámedikki, go sii leat bargan nannosit dán guvlui maŋemus jagiid. Stipeanddat leat lassánan 90 000 ruvdnui jahkásaččat sidjiide geat váldet sámi mánáidgárdde- ja vuođđoskuvlaoahpaheaddjeoahpu, ja sii leat maiddái čađahan sierra rekrutterenprošeavtta sámi servodaga oahpahusdárbbuid várás. 

– Lea stuora dárbu oažžut eanet nuorra oahpaheddjiid geain lea sámi giella-, kultur- ja servodatgelbbolašvuohta, ja min oahppofálaldagat leat mearrideaddjin sámi skuvllaid boahtteáigái, dadjá rektor Liv Inger Somby. 

Rektor rámida maid Sámi allaskuvlla bargiid, geat leat bargan studeanttaid rekrutteremiin, ja aktiivvalaččat searvan ollu iešguđetlágan foraide ja čoagganemiide. 

PPO lea čoavdda ožžodit eambbo oahpaheddjiid 

Lea maid stuorra beroštupmi Sámi allaskuvlla sámi praktihkalaš-pedagogalaš oahpuide, mii lea oassin báikkálaš sisaváldimis. Sámi praktihkalaš-pedagogalaš oahppu 5.-13. ceahkis leat 27 ohcci. Sámi praktihkalaš-pedagogalaš oahpus fidnofágaide 8.-13. ceahkis leat 29 ohcci. 

– Praktihkalaš-pedagogalaš oahput leat dehálaččat, go dat gealbudahttet kandidáhtaid geain lea fága- ja fidnočehppodat oahpaheaddjevirggiide. Oahput leat mielde nannemin sihke vuođđooahpahusa ja fidnofágaid oahpaheddjiid rekrutterema, seammás go dat sihkkarastet pedagogalaš gelbbolašvuođa sámi giella- ja kulturáddejumiin. Nu leat dát ge oahput dehálaččat sámi skuvlla ja servodaga dárbbuid dustemii, dadjá rektor. 

Sámi mánáidgárdeoahpaheaddjeoahpu ohcciidlogu sáhttá geahččat nationála ovdáneami ektui, mas mánáidgárdeoahpaheaddjeoahpuin leat ohcciidlogut njiedjan máŋggaid jagiid. Seammás sáhttá leat sivvan dasa ahte báikkálaččat lea lassánan beroštupmi Sámi vuođđoskuvlaoahpaheaddjeohppui 1.-7. seamma ládje. 

Hui stuora beroštupmi giellaoahpuide 

Maŋimus logut báikkálaš sisaváldimis čájehit maiddái ahte lea stuora beroštupmi váldit sámegiel álgokurssaid SAAL 1 ja SAAL 2, mat leat davvisámegiela álgokursa praktihkalaš oahpahallanoktavuođas. 

Leat maiddái buorit ohccit ovttaskas fáttáide bachelor dásis sámegielas ja lea maid stuora beroštupmi váldit mastergráda sámegielas ja sámi girjjálašvuođas. 

• SÁM1 ja SÁM 2: 107 ohcci 
• Ovttaskas oahput bachelor dásis: 51 ohcci 
• Mastergráda sámegielas ja sámi girjjálašvuođas: 16 ohcci 
• Dulkaoahppu, julevsámegiella - dárogiella: 3 ohcci 
• Dulkaoahppu, lullisámegiella - dárogiella: 4 ohcci 
• Ovttaskas oahput duojis: 37 ohcci 
• Sámi riekteipmárdus: 19 ohcci 

Ii leat vel menddo maŋit, vejolaš ohcat geasset nai 

Sámi allaskuvla deattuha ahte oahpaheaddjeoahput leat dehálaččat sihke mánáidgárddiide, skuvllaide ja servodahkii ollislaččat. Oahpuid rekrutteremiin ii leat dušše sáhka gokčat oahpaheddjiid dárbbu, muhto maiddái sihkkarastit ja ovdánahttit sámegiela, kultuvrra ja máhtu boahtteáigái. 

Geasset áigu Sámi allaskuvla rahpat vejolašvuođa váldit eanet studeanttaid mánáidgárdde- ja vuođđoskuvlaoahpaheaddjeoahpuide, go min mihttomearri lea sihkkarastit ahte sámi ja sámegielat ohppiin leat oahpaheaddjit geain lea nanu oahppu.

 – Sii geat leat eahpesihkkarat, dahje geat eai leat vel mearridan, sis lea vejolašvuohta ohcat min oahpuide báikkálaš sisaváldimiin. Danin mii ávžžuhit buohkaid geain lea beroštupmi dahje miella álgit oahpaheaddjin, lohkat gielaid ja eará fágaid - ahte sii geavahit dán vejolašvuođa, dadjá rektor Liv Inger Somby.