Doseanta emerita ja Sámi allaskuvlla ovddeš rektor Asta Mitkijá Balto lea ožžon Várddou 2025 dieđalaš bálkkašumi.

Bálkkašumi juohká Várdduo, Sámi dutkamiid guovddáš Ubmi universitehtas, ja galgá nannet beroštumi sámi dutkamii ja loktet ovdan earenoamáš buori dieđalaš barggu.

Balto oažžu bálkkašumi guhkesáigásaš barggu ovddas sámi ja eamiálbmotguoskevaš dutkamiin ja oahpahusain, sihke Sámis ja riikkaidgaskasaččat.

Go lea bidjan sámi máhtu guovddážii, de lea son ovddidan dekoloniserejeaddji dutkan- ja oahpahusvugiid. Su barggus lea leamaš stuora mearkkašupmi oahpaheaddjioahpahussii, skuvlii, mánáidgárddiide ja politihkkaovddideapmái.

Bálkkašupmi geigejuvvui Sámi ja álgoálbmogiid oahpahuskonferánssas Sámi allaskuvllas.

Mii sávvat lihkku Asta Mitkijá Baltoi!