Sámi allaskuvla lea njukčamánu searvan SPICA intensiivagursii mii lágiduvvui dán jagi Nuukas, Kalaallit Nunaatas. Dán jagi SPICA fáddán lei: Exploring Culture, Nature, and Language for Sustainable Futures. Mo sáhttet Kalallit Nunaata meahcit/eatnamat, vásáhusat, máhttu ja eallinviisodat - árbevirolaš ja ođđaáigásaš - inspireret guoddevaš boahtteáigái? 

Dát intensiiva vahkku addá studeanttaide áidnalunddot vejolašvuođa dievasmahttit iežaset fágalaš gelbbolašvuođa ja  metodaovddideami ja lea buorre vejolašvuohta boahtteáiggi fierpmádathuksemii. 

Sámi allaskuvllas leigga dán jagi mielde goalmmát jagi oahpaheaddjeoahpu studeanttat Laila Labba ja Peder Mathias Buljo. Fágaoahpaheddjiin leigga mielde Máren Palismaa ja Anne Ingebjørg Svineng Eriksen. 

Intensiivakursavahkus leat čuvvon logaldallamiid, oahpásmuvvan Kalaallit Nunaata kultuvrii ja historjái, leamašan fanasmátkkis ovttas eará riikka studeanttaiguin ja oahpaheddjiiguin. Studeanttain leamašan joavkkobarggut ja fágalaš ovdanbuktimat. 

Mátki lei hui miellagiddevaš ja bijai ollu jurdagiid johtui. Mii leat ollu oahppan  ja erenomážit daan birra man láhkai Kalaallit Nunaata olbmuide lea váikkuhan eallit Dánmárkku stivrejumi vuolde. 

Boahtte jagi SPICA intensiivagursa dollojuvvo Dánmárkkus ja jagi 2028 SPICA lágiduvvo Sámi allaskuvllas. 

Mii lea SPICA?

SPICA lea Nordplusa ruhtadan fierpmádat oahpaheaddjeoahpu várás, ja lea fágalaš ovdánahttinarena mánáidgárdde- ja oahpaheaddjeoahpu oahpaheddjiide ja studeantaoahpaheddjiide Davviguovllus. Fierpmádagas leat mielde ovttasbargoguoimmit Suomas (Oulu universitehta), Norggas (Sámi allaskuvla ja Sørøst-Norge universitehta), Ruoŧas (Malmö universitehta), Dánmárkkus (UCL universitehta allaskuvla), Fearasulluin (Fearsullo universitehta), Islánddas (Islándda universitehta) ja Ruonáeatnamis (Kalaallit Nunaata universitehta/Ilisimatusarfik). Sørøst-Norge universitehta lea koordinerejeaddji ásahus. Sámi allaskuvla lea leamaš miellahttun ja aktiiva oassálasti fierpmádagas 2024 rájes.