Ylva Jannok Nutti oažžu Várdduo dieđalaš bálkkašumi 2023
Sámi allaskuvlla vuosttašamanueansa Ylva Jannok Nutti oažžu dán jagi Várdduo dieđalaš bálkkašumi. Bálkkašupmi juhkkojuvvo jahkásaččat olbmui gii lea bidjan earenoamáš áŋgiruššama dutkamii mas sámi fáttát leat guovddážis.
Várdduo - Sámi dutkanguovddáš Upmi Universitehtas juohká jahkásaččat dieđalaš bálkkašumi dainna áigumušain ahte loktet beroštumi sámi dutkamii ja sámi dutkama gaskkusteapmái. 2023 bálkkašupmi addo Ylva Jannok Nuttii, Sámi allaskuvllas.
Ákkastallmis boahtá ovdán ná:
Ylva Jannok Nutti áŋgiruššan sámi ja eamiálbmotpedagogalaš dutkamii lea hui viiddis ja lea leamaš dehálaš dekoloniserema ja revitaliserema dáfus. Jannok Nutti lea erenoamáš vuogi mielde bargan sámi pedagogalaš dutkamiin, mas nana dieđalaš máhttu ovttasdoaibmá beaivválaš práksisain skuvllas ja ovdaskuvllas, dainna lágiin ahte buktá ovdan máŋggabealat sámi máhtu.
Ylva Jannok Nutti dieđalaš publikašuvnnat váikkuhit ollu sihke Sámis ja riikkaidgaskasaččat. Dat sisttisdollet teavsttaid máŋgga gillii, earret eará davvisámegillii, ja leat dan láhkai leamaš mielde oidnosii oažžut sámegielaid pedagogalaš dutkamis.
Dat mearkkaša hui ollu
- Lei vuorddehahtti ja somás diehtu. Mun šadden hui ilus go ožžon dieđu ahte oaččun Várdduo dieđalaš bálkkašumi. Dat mearkkaša ollu munnje, mun dovddan stuora giitevašvuođa ja lea buorre duođaštus ahte lean bargan juoidá mii lea mávssolaš earáide, dadjá Ylva Jannok Nutti.
Bargan Norggas 10 jagi
Ylva Jannok Nutti válddii doavttergráda 2011:s Luleå tekniska universitetas. Maŋŋil nákkáhallama son álggii bargui Sámi allaskuvlla oahpaheaddjeohppui ja lea dan rájes bargan Norggas. Ylva oaččui post.doc virggi UiT:s ja máhcai dan maŋŋil fas allaskuvlii Guovdageidnui, gos son bargá dál.
- Dál go lean bargan Norggas badjel 10 jagi, de lea buorre go fuomášuhttin boahtá olggobealde ja oaččun Várdu dáiddalaš bálkkašumi, dadjá Jannok Nutti.
Oahpaha ja vel máŋggain prošeavttain mielde
Odne Ylva Jannok Nuttis lea ovddasvástádus sámi vuođđoskuvlaoahpaheddjiid masterohppui 1-7, gos son koordinere, oahpaha ja bagada studeanttaid. Son lea prošeaktajođiheaddji maiddái Skolverkets fortbildningsinsats för samiska lærare som undervisar i skolor på svensk sida. Son lea maid loahpaheame akšuvdnadutkanprošeavtta mas lea čállán ollu dieđalaš artihkkaliid ja iešguđetlágan publikašuvnnaid.
- Mun ja okta eará dutki eará universitehtas Ruoŧas ledne ovttasbargan pedagogagaiguin ovtta sámi ovdaskuvllas Ruoŧa bealde. Prošeavttas, man Dieđalašráđđi ruhtada, leat pedagogat, mánát ja dutkit ovttas čađahan doaimmaid ovdaskuvllas guokte jagi juo. Aktivitehtat leat čađahuvvon sámi ovdaskuvllas mas lea fokus sámi árbevirolaš máhttui ja muitalanárbevieruide, muitala bálkkašumi vuoiti.
Ylva Jannok Nutti lea maid mielde ovtta eará dutkanprošeavttas, mas árvvoštallet ođđa oahppoplánaid ásaheami vuođđoskuvllain Norggas.
- Dán prošeavttas mii ovttasbargat sámi skuvllaiguin miehtá Norgga, mas váldomihttu lea geahčadit movt ođđa oahppoplánat sisafievrriduvvojit skuvlii, de maiddái lea oassemihttu fuomášuhttit buriid sámi oahpahanovdamearkkaid ja praksisaid, muitala Jannok Nutti.
Ylva Jannok Nutti galgá vuostáváldit Várddus dieđalaš bálkkašumi giđđadoaluin 2024:s.
