njukčamánu 16. beaivi 2023

SáMOS konferánsa "Unna olbmožiid dihtii" - guhkiduvvon dieđihanáigemearri

Sámedikki ovdánahttinprošeakta SáMOS, Sámi mánát ođđa searvelanjain, loahpahuvvo 2023:s. Dan aktavuođas lágida SáMOS ovttas Sámi allaskuvllain loahpakonferánssa Diehtosiiddas Guovdageainnus mánáidgárdedutkiide, pedagogaide ja eará fágaolbmuide.

Konferánssa fádda lea kvalitehtaovdánahttin sámi- ja álgoálbmotpedagogihkas ja -didaktihkas. Konferánssas ovdanbuktojuvvojit ovdánahttinprošeavtta SáMOSa bohtosat ja vásáhusat. Sámi ja eará álgoálbmotmáilmmi dutkit buktet ovdii iežas pedagogalaš dutkamiid.