Sámi allaskuvlla rektor lea válljejuvvon eamiálbmotdutkama internašunála áigečállaga doaimmahusgoddái

Sámi allaskuvlla rektor Jelena Porsanger lea bovdejuvvon ja dohkkehuvvon AlterNative-áigečállaga doaimmahusgoddái golmma jahkái 2015 rájes.  AlterNative: An International Journal of Indigenous Peoples  lea eamiálbmotdutkama internašunála áigečála mas lea fágaguoibmeárvvoštallan (peer-review). Áigečála almmuhuvvo njelljii jahkái sihke bábirhámis ja neahtas online. Áigečála lea almmuhuvvon 2004 rájes. Doaimmahusgottis leat dán rádjái leamašan eamiálbmotdutkit ee. Aotearoas (Ođđa Selánddas), Kanadas, USA:s, Austrálias, Perus, Tongas ja Sámis.

Áigečála čalmmustahttá akademalaš ja eamiálbmot teoriijaid ja analysaid mat leat dahkkon dieđalaš eamiálbmot perspektiivvas.

• Áiggun dahkat AlterNative-áigečállaga bures dovddusin sámi dutkiid gaskkas miehtá Sámi, – lohká Jelena Porsanger. – Áigečála lea dál vuosttaš dási dieđalaš publikašuvdnakanála Norgga alitoahpu statistihka dáhtabásas  (http://dbh.nsd.uib.no/statistikk/kategori_publiseringer.action) . Áiggošin geahččalit loktet AlterNative almmuhankanálaid bajimus dássái. Mu mielas AlterNative deavdá bures eavttuid:  áigečállagis lea internašunála doaimmahusgoddi ja fágaguoibmeárvvoštallan, ja áigečállaga lohkkit  leat miehtá máilmmi.

Áigečállaga ruovttusiidu: http://www.alternative.ac.nz/