Elektruvnnalaš rektorválggat gitta 14.04.23 rádjái
Sámi allaskuvlla válgastivra lea 16.03.23 ovttajienalaččat dohkkehan nominašuvdnalávdegotti rektor- ja prorektorkandidáhtaid evttohusaid.
Guokte teama gilvalit rektoráhta doaibmagotti nalde:
- Laila Susanne Vars, rektorkandidáhtta ja Ylva Jannok Nutti, prorektorkandidáhtta
- Liv Inger Somby, rektorkandidáhtta ja Henrik Samuel Valkeapää, prorektorkandidáhtta
Goappaš rektorevttohasat leaba olggobeale kandidáhtat.
Team Vars/Jannok-Nutti
Laila Susanne Vars (46) lea láhkačeahppi ja sus lea PhD olmmošvuoigatvuođaid ja álgoálbmotvuoigatvuođaid suorggis. Son lea leamaš direktevra álgoálbmot vuoigatvuođaid gealboguovddážis Gáldus, mii šattai oassin Norgga olmmošvuoigatvuođaásahussii (NIM). Vars lei fágadirektevra NIMas go válljejuvvui rektoriin Sámi allaskuvlii 2019:s. Son lei várrepresideanta Norgga Sámedikkis 2009-2013 ja sus lea guhkes hárjáneapmi luohttámušdoaimmain.
Ylva Jannok Nutti lea prorektorevttohus Laila Susanne Vars teamas. Sus lea PhD pedagogihkas ja lea fágalaš jođiheaddji oahpaheaddjeoahpuid masteris ja mánáidgárddeoahpaheaddji oahpu bacheloras.
Team Somby/Valkeapää
Liv Inger Somby (60) lea dál ossodatdirektevra Norgga Sámedikki gulahallanstábas. Sus lea masteroahpu journalistihkas ja lea guhka bargan journalistihka ja gulahallama fágasuorggis. Son lea earret eará bargan sihke radio- ja tv journalistan NRK:s, SVT Sámis ja Guoládaga Sámi Radios. Lea maid bargan eamiálbmot vuoigatvuođaid gealboguovddážis Gáldus ja lea journalistihkka fágabargi leamaš Sámi allaskuvllas ollu jagiid. Sombys lea guhkes hárjáneapmi luohttámušdoaimmain.
Henrik Samuel Valkeapää lea prorektorevttohus Liv Inger Somby teamas. Son lea allaskuvlalektor duodje- ja hábmenfágain. Son lea duoji bachelora prográmmajođiheaddji.
Rektorválga
Rektorválggat čađahuvvojit elektrovnnalaččat 29.03.-14.04.23 áigodagas. Leat Sámi allaskuvlla bargit ja studeanttat geat sáhttet jienastit.
- Liŋkka jienasteapmái boahtá e-poastta bokte buohkaide geain lea jienastanriekti (bargit ja studeanttat).
- Válganjuolggadusaid gávnnat dás.
Ášši duogáš:
Sámi allaskuvlla stivra lea čakčamánu 2022:s áššis S-24/22 mearridan njunušjođihanmodealla, mas ledje guokte molssaeavttu. Vuosttaš molssaeaktu lei ahte galgá virgáduvvon rektor, ja nubbi molssaeaktu lei ahte galgá válljejuvvon rektor. Stivra váljjii doalahit válljejuvvon rektor modealla.
