Duodji Reader preassagova. Govven: Árvu.

guovvamánu 16. beaivi 2022

Okta olmmoš ii sáhte muitalit visot

Duodji Reader
Sámi allaskuvla ja Norwegian Crafts leat ovttas buvttadan girjji Duodji Reader mas čiekŋudit duodjái. Girjjis leat logi vuođđoteavstta maid sámi duojárat, dáiddárat ja akademihkkárat leat čállán. Teavsttat gaskkustit sihke historjjálaš ja dáláš máhtu duojis ja sámi estetihkas, hervendáidagis, kultuvrras ja eallinvuogis.

Dán čoakkáldaga teavsttat leat ovdal almmuhuvvon, earet okta, muhto dál vuosttaš geardde máŋgga sámegillii ja lassin vel eŋgelasgillii. Girjji doaimmaheaddjit leaba Sámi allaskuvlla dutki guovttos Gunvor Guttorm gii lea duodjeprofessor ja Harald Gaski gii fas lea girjjálašvuođaprofessor.

Lea sámi lágadus Davvi Girji mii almmuha girjji Duodji Reader: Guoktenuppelot čállosa duoji birra sámi duojáriid ja dutkiid bokte maŋimuš 60 jagis / A selection of twelve essays on duodji by Sámi duojárat and writers from the past 60 years.

Nubbi girji mii aitto lea almmuhuvvon lea nammadutkanfáttas.

Minoritehtagielaid namat njálmmálaš ja čálalaš oktavuođain máŋggakultuvrralaš máilmmis   
 

Jagi 2019 dollojuvvui giellafágalaš symposia, NORNA 49. symposia Sámi allaskuvllas, gos suokkardallojuvvojedje sihke minoritehtagielaid olbmo- ja báikenamat máŋggalágan nammafágalaš ja fágaidrasttideaddji geahččanguovlluin.

Symposia sáhkavuoruid vuođul lea dál almmuhuvvon Dieđut-ráiddus girji, mii sisttisdoallá ovcci artihkkala mat leat čállon davviriikkalaš gielaide ja eaŋgalsgillii.  Golbma artihkkala leat čállon davvisámegillii ja dasa lassin jorgaluvvon dárogillii.

Girjji doaimmaheaddjit leat Sámi allaskuvlla professor Kaisa Rautio Helander, Norgga Árktalaš Universitehta UiT vuosttašamanueansa Aud-Kirsti Pedersen ja Sámedikki ráđđeaddi Mikkel Rasmus Logje.  

Jagi 2019 lei ON válljen riikkaidgaskasaš eamiálbmotgielaid jahkin. NORNA 49. symposia gulai eamiálbmotgielaid jagi sámi lágidemiide, ja vuosttaš geardde NORNA historjjás lei maiddái sámegiella symposiagiellan. NORNA lea davviriikalaš ovttasbargu nammadutkamis.

Dieđut lea Sámi allaskuvlla čálaráidu mas almmuhuvvojit sihke artihkkalčoakkáldagat ja sierranas dutkamušat servodat-,  gielladutkamis ja láhkadiehtagis. Almmuheamit leat sáme-, dáro-, ruoŧa-, suoma-, eŋgelas- ja ruoššagillii.

Almmuhandilálašvuohta

Girjealmmuhandilálašvuohta gos doaimmaheaddjit ovdanbuktet oasážiid girjjiid sisdoalus lea:

  • guovvamánu 22.b. 2022 dii 1400-1530 Sámi allaskuvllas,

Dasa lassin lea Duodji Reader girjji almmuheapmi Kárášjogas beaivvi maŋŋil. Sihke Gunvor Guttorm ja Harald Gaski leaba sajis:

  • guovvamánu 23.b. 2022 dii 1800-1930 Sámi girjjálašvuođa guovddážis Kárášjogas.

Almmuhandilálašvuohta lea rabas buohkaide. Bures boahtin!