Oahpaheaddjeoahpu gárven

Gárve iežat 4-jagáš oahpaheaddjeoahpu kvalifiserenortnega bokte!  

Dá lea fálaldat dutnje guhte leat álgán, muhto it leat gárven sámi dábálaš- dahje vuođđoskuvlaoahpaheaddjeoahpu. Mii fállat dutnje guhte leat álgán oahpaheaddjeohppui ovdal 2017, heivehuvvon vejolašvuođa gárvet Sámi vuođđoskuvlaoahpaheaddjeoahppu 1.-7 ceahki dahje 5.-10. ceahki. 

Dát lea geahččalanortnet gealbudahttit oahpaheddjiid, ja lea oassi ráđđehusa doaibmabijuin unnidit oahpaheaddjeváilevašvuođa . Geahččalanortnet lea áigeráddjejuvvon fálaldat mii bistá 2025 rádjai 

Studeanttat guđet čuvvot ortnega ja gárvejit oahpuset ožžot oahppoduođaštusa njeallje jagi Sámi vuođđoskuvlaoahpaheaddjin. Dat mearkkaša ahte sii guđet leat álgán dábálašoahpaheaddjeohppui fertejit válljet gárvejit go oahpu vuođđoskuvlla 1.–7. ceahkkái vai 5. – 10. ceahkkái. 

Oahpu birra

Kvalifiserenortnet lea heivehuvvon oahppofálaldat mas mii duinna ovttas ráhkadit plána man mielde beasat gárvet iežat oahpu. Makkár fágaid fertet čađahit vuolgá das mii dus váilu gárvet oahpu 4-jagáš Sámi vuođđoskuvlaoahpaheaddjeoahpuid 1.-7. dahje 5.-10. ceahki rámmaplána mielde. Bachelorbargu lea bákkolaš dán oahpus. 

Bargonoađđi ja čađaheapmi

Lea dehálaš ahte ieš árvvoštalat man olu dus lea vejolašvuohta studeret iežat eallindilálašvuođa ektui. Prošeavtta čađa lea vejolaš gárvet oahpu 2025 lohpa rádjai, ja de sáhttá leat jierpmálaš heivehit man olu studeret guđege jagi vai leat sihkar ahte gearggat ovdal dán áigemeari.  

Jus dus váilot fágat, de lea vejolaš váldit juogo prográmmafágaid Sámi vuođđoskuvlaoahpaheaddjeoahpu 1.–7. dahje 5.–10. ceahki masteris, dahje váldit fágaid eará oahppoásahusain mat fállet fágaid mat dus váilot. Lea dehálaš ahte čielggadat dan minguin ovdagihtii. Mii ávžžuhit buot kandidáhtaid ieža aktiivvalaččat ohcat oahpuid maid sáhtát čađahit. 

Sámi vuođđoskuvlaoahpaheaddjeoahppu 1.-7. ceahkki

Sámi vuođđoskuvlaoahpaheaddjeoahppu 1.-7. Ceahkis leat sámegiella, dárogiella/ruoŧagiella/suomagiella ja matematihkka bákkolaš fágat. Lassin boahtá 60 oč oahpahusfága dahje skuvlarelevánta fága, ja don fertet deavdit pedagogihka- ja oahppomáhttu gáibádusaid.  

Oahpu guovddážis lea 15 oahppočuoggasaš bákkolaš bachelorbargu. Muđui lea gárven gitta das mii dus váilu vai deavddát čuovvovaš gáibádusaid: 

  • 60 oč. pedagogihkka ja oahppimáhttu, oktan bachelorbargguin (15 oč.) 

  • 60 oč. Sámegiela oahpahusfága 

  • 30 Dárogiela oahpahusfága 

  • 30 Matematihka oahpahusfága 

  • 60 dahje 30+30 oahpahusfága / skuvlarelevánta fága  

  • 100 beaivvi hárjehallan 

Sámi vuođđoskuvlaoahpaheaddjeoahppu 5.–10. ceahkki  

Sámi vuođđoskuvlaoahpaheaddjeoahppu 5.-10. ceahkis leat golbma oahpahusfága, ja guovtti oahpahusfágain dus galget leat 60 oč.  Lassin boahtá 60 oč oahpahusfága dahje skuvlarelevánta fága, ja don fertet deavdit pedagogihka- ja oahppomáhttu gáibádusaid.  

Oahpu guovddážis lea 15 oahppočuoggasaš bákkolaš bachelorbargu. Muđui lea gárven gitta das mii dus váilu vai deavddát čuovvovaš gáibádusaid: 

  • 60 oč. Pedagogihkka ja oahppimáhttu, oktan bachelorbargguin (15 oč.) 

  • 60 sámegiela oahpahusfága 

  • 60 oahpahusfága 

  • 60 dahje 30+30  oahpahusfága / skuvlarelevánta fága 

  • 100 beaivvi hárjehallan 

Sisabeassangáibádusat

Don fertet ceavzán unnimusat 150 oahppočuoggá Sámi dábálašoahpaheaddjeoahpus dahje 4-jagáš Sámi vuođđoskuvlaoahpaheaddjeoahpus. Oahppu ferte álggahuvvon ovdal 2017. Jus dus leat 150 oahppočuoggá eará oahpus, de dađibahábut it leat kvalifiserejuvvon dán prošektii. 

Dasa lassin berre ohcci čađahan eanaš oasi hárjehallamiin.  

Ohccit guđet dárbbašit bargohárjehallama galget buktit politiijaduođaštusa. Buot studeanttaid dohkálašvuohta árvvoštallojuvvo sihke oahpahusas ja vejolaš bargohárjehallamis olles oahppomannolagas. 

Bargovejolašvuođat 

Čađahuvvon oahpu maŋŋel šattat sámi vuođđoskuvlaoahpaheaddjin geas lea oahpahusgelbbolašvuohta juogo 1.–7. ceahkkái dahje 5.–10. ceahkkái vuođđoskuvllas. Oahppu sáhttá maid addit gelbbolašvuođa eará bargguide nugo skuvlaráđđeaddin, gulahallanráđđeaddin, diehtojuohkinbargui, rávisolbmuidoahpahussii ja skuvlajođiheapmái. 

Movt boahtit johtui

Váldde oktavuođa oahppohálddahusain oažžun dihte eanet dieđuid dahje árvvoštallan dihte iežat vejolašvuođa beassat mielde dán prošektii: oahppohalddahus@samas.no 

Nevvodettiin du, mii geahččat makkár fágaid leat jo ceavzán, ja sáhttet go heivehuvvot 4-jagáš Sámi vuođđoskuvlaoahpaheaddjeohppui 1.–7. ceahkkái dahje 5.–10. ceahkkái. Mii ráhkadit individuála oahpahusplána dan mielde mii dus jo lea ja maid Sámi allaskuvla sáhttá fállat. Dus lea maiddái vejolašvuohta čađahit fágaid eará oahppoásahusain. 

Bargohárjehallan 

Vuođđoskuvlaoahpaheaddjeoahpus lea 100 beaivvi bagadallojuvvon ja árvvoštallojuvvon bargohárjehallan. Studeanttat geat eai leat čađahan buot hárjehallamiid, muhto leat bargan skuvllas oahpaheaddjin, sáhttet dán prošeavttas beassat muhtin oasi hárjehallamiin reálagelbbolašvuođa duođašteapmi bokte. Ohccit geain ii leat skuvla bargosadjin, fertejit deavdit bagadallojuvvon ja árvvoštallojuvvon bargohárjehallangáibádusa. 

Fuomáš ahte dávjá lea oassi oahpahusfágaid bargogáibádusain ahte leat čađahan hárjehallama fágas. Jus nu lea, de fertet dan gáibádusa deavdit vaikko muđui deavddášit oahpu bargohárjehallama gáibádusa beivviid ektui.   

Stipeanda ja loatna 

Jus beasat geahččalanortnegii, de leat dábálaš studeanta, ja sáhtát ohcat loana ja stipeandda Loatnakássas 

Skuvlaeaiggádat sáhttet ohcat oahppostipeandda bargiide geain ii leat dohkkehuvvon oahpaheaddjeoahppu. Skuvlaeaiggádat sáhttet maid ohcat rekrutterenstipeandda olbmuide geat eai leat vel barggus skuvllas. Ohcanáigemearri dasa lea 15.03. oahppojagi ovdal. Loga eanet Oahpahusdirektoráhta neahttasiidduin.