borgemánu 23. beaivi 2019

Oahpaheaddjeoahppu eamiálbmot perspektiivvas

Sámi Allaskuvllas lea dehálaš ovttasbargu eará eamiálbmotásahusaiguin ovddidit alit oahpahusa ja dutkama. Dál go ođđa oahppojahki lea álgime, de lea Sámi allaskuvla lihkkohan oažžut Canada-verdde guossin, mii lea ollu dutkan ja bargan ovdánahttit inuihtta oahpaheaddjeoahpu Bachelordásis.

Dr. Kirk Anderson, Memorial University of Newfoundland, boahtá finadit Sámi Allaskuvllas borgemánu 26.b.-28.b. Son searvá čoahkkimiidda ságastallat ovttasbarggu birra, muhto fállá maid rabas logaldallama.

  • Distaga 27.b. dii 13.15 (dakka maŋŋil almmolaš rahpama) doallá son guokte diimmu rabas logaldallama Reaššádat-lanjas iežas barggu birra, mas fáddá lea inuihtta oahpaheaddjeoahpu ovdánahttin. Studeanttat leat earenoamážit vurdojuvvon logaldallamii, ja maiddái earát sáhttet searvat.

UArctic fierpmádat
UArctic lea fierpmádat mas leat árktalaš guovlluid alitoahppo- ja dutkanásahusat mielde, main ulbmil lea nannet davviguovlluid álbmogiid alitoahpu ja dutkamiid vai dat bohtet ávkin sin álbmogiidda ja guovlluide.

Sámi allaskuvla lea miellahttu University of Arctic (UArctic) fierpmádagas. Memorial University of Newfoundland lea maid mielde fierpmádagas, danin lea ovttasabargu earret eará oahpaheaddjeoahpuid ovdánahttit.

Studeantalonohallan
UArctic bokte lea studeanttain vejolašvuohta mannat eará eamiálbmotguovlluide ja daid oahppoásahusaide oahpposaji lonohallamii. Ovdamearkka dihte lea north2north prográmma mii lea earenoamážit davviguovlluid álbmogiid várás.

Jus háliidat eambbo diehtit makkár vejolašvuođat leat oahppolonohallamii eará eamiálbmotásahusain, de sáhtát váldit oktavuođa Sámi allaskuvlla internašunaliserenkonsuleanttain Anne Lovise Hættain, gii bargá Oahppohálddahusas, dahje allaskuvllalektoriin Elisatbeth Utsi Gaupain.