Ođđasat
- Plánegoahtán almmuhit dán jagaš “Sámi logut muitalit” raportta
- KIF-lávdegoddi finai Sámi allaskuvllas
- Ođđa dutkanprošeakta ohcá boazosámi nuoraid geat searvvaše dutkamii
- Sámi allaskuvla bovde boahtit gullat njuolggosáddaga “Mii guldalit”
- Ruvdnaprinseassa boahtá Sámi allaskuvlii
- Ođđa vejolašvuohta ohcat čavčča oanehisáiggeoahpuide
- Olgoriikastudeanttaid oahppodivat
- Čavčča deaivvadanplána ja diibmoplána
- Innspill på åpent høringsmøte i Stortinget
![](https://samas.no/sites/default/files/styles/hovedbilde/public/harald_gaski.jpg?itok=z0y_wJSi)
Harald Gaski nammaduvvon gudnedoavttirin
Sámi allaskuvlla professor Harald Gaski lea nammaduvvon Ubmi universitehta Humanisttalaš fakultehta 2024 gudnedoavttirin.
Nammadeame ákkastallamis boahtá ovdán ahte son lea earenoamážit áŋgiruššan nannet sámegiela ja sámi girjjálašvuođa, ja dáinna lágiin maid movttiidahttá sihke dutkiid ja girječálliid. Gaski lea evttohuvvon Ubmi fakultehta bargiiguin.
- Lea hui buorre dovdu nammaduvvot gudnidoavttirin, erenoamážit go mu doaimmat sámegillii deattuhuvvojit. Vaikko lean olu johtán olgoriikkain logaldallamin sihke majoritehtaálbmogiidda ja eará álgoálbmogiidda, de lea goit álo leamaš váimmu lagamusas sámegillii hállat ja čállit. Lean hui ilus oažžut dovddastusa ahte dat lea movttiidahttán sihke čálliid ja dutkiid, dadjá Harald Gaski.
Sámi allaskuvlla rektor Liv Inger Somby lohká dán illu sáhkan go eará universitehtat gudnejahttet ná vuogas vugiin Sámi allaskuvlla senior dutki.
- Sámi allaskuvlla bealis de sávvat hui ollu lihkku min professorii Harald Gaskii. Son gal duođaid ánssáša šaddat gudnedoavttirin, go lea áŋgiruššan ja ovdánahttán sámi girjjálašvuođa, sihke dutkamis ja oahpaheamis. Gaski lea erenoamáš čeahpes logaldalli ja dávjá searvá kultuvra- ja servodatdáhpáhusaide sihke sámis ja máilmmis, dadjá rektor Liv Inger Somby.