Ođđasat
- Aimo Aikio geigii girjjiid skeaŋkan Sámi allaskuvlii.
- Sámi allaskuvlla viiddida vejolašvuođa beassat masterprográmmii
- Álggahanvahkku
- Jon Henrik Fjällgren boahtá
- 25-jagi ávvudoalut
- Sámi leavgga "riegádanbeaivi"
- Taking place –Moving borders – riikkaidgaskasaš girjjálašvuođakonferánsa
- Máŋgalot ohcci ođđa eamiálbmotjournalisttaohppui
- 4 ođđa Sámi ofelačča almmohuvvoje Riddu Riđđus
![](https://samas.no/sites/default/files/styles/hovedbilde/public/ylva_jannok_nutti_govven_anne_katja_gaup_johhti_productions_2.jpg?itok=hTHXxcCL)
Earenomáš oahppofálaldat sámi oahpaheddjiide ruoŧabeale
Sámi allaskuvla lea guhkidan ohcanáigemeari giđa 2022 oahpuide. - Dál lea ain vejolašvuohta ohcat Samisk språkdidaktik med fokus på språkanvändande och berättande texter ohppui. Oahppu lea heivehuvvon ruoŧabeale oahpaheddjiide geain váilu sámegieloahpu dahje oahpaheaddjeoahpu, dahje sidjiide geat leat váldán oahpaheaddjeoahpu ja sávašii váldit joatkkaoahpu, muitala oahpu prošeaktaovddasvástideaddji Ylva Jannok Nutti.
Oahppu lea heivehuvvon Sámi oahpaheddjiide geat barget Ruoŧa bealde ja lágiduvvo geabbilis vuogi mielde.
- Vai nu olusat go vejolaš dain geain lea buorre giellamáhttu ja barget oahpaheddjiin galget sáhttit searvat, de galget digitála gulahallanreaiddut leat guovddážis. Eaktun searvamii lea dieđusge ahte oahpaheaddji lea skuvlaeaiggádiin gulahallan ja dat lea miehtan ahte searvvašit ohppui, muitala oahpu koordináhtor Elisabeth Utsi Gaup.
Dat oahppu addá vejolašvuođa kursaáigge atnit ávkki iežas vásáhusain oahpaheaddjebarggus.
- Lea oktasaš álggaheapmi, gos beassá seammás oahpásmuvvat ja nu nannet sámi oahpaheddjiide fierpmádaga. Maŋŋil dan juohkásit giellajoavkkuide mii addá buori vejolašvuođa vuodjudit iežaset guovllu njálmmálaš árbevirrui ja atnit dan gulahallamis, muitala oahpu koordináhtor Elisabeth Utsi Gaup.
Oahppovuogit ja oahpu lágideapmi
Ohppui gullet njeallje oasseáiggi kurssa mas juohke kurssas oažžu 7.5 oahppočuoggá. Giđđat álggahuvvo Samisk språkdidaktik med fokus på språkanvändande och berättande texter oasseáigge kursa mii lea oassin dán oahpporáiddus. Jus čađahat visot oasseáigge kurssaid de gártet oktiibuot 30 oahppočuoggá allaskuvladásis. Oahpu ulbmil lea nannet ja čiekŋudit gelbbolašvuođa sámegielas, ja nu maiddái loktet gelbbolašvuođa ja addit lassioahpu sámi oahpaheddjiide.
- Dat lea earenoamáš fálaldat skuvllaide geat háliidit loktet gelbbolašvuođa, muhto ii leat resurssa sáddet oahpaheddjiid guhkit áigái eará guovlluide váldit oahpu, muitala prošeaktaovddasvástideaddji Ylva Jannok Nutti.
Oahppu mii boahtte giđa fállojuvvo álgá 07.02.2022 ja ohcanáigemearri lea 24.01.2022.
Loga eanet oahpu birra: Samisk språkdidaktik med fokus på språkanvändande och berättande texter
Sámi allaskuvlla ja Skolverket ovttasbargu
Sámi allaskuvla álggahii dán oahpporáiddu 2018 ovttasráđiin Skolverketiin, ja dál lea soahpamuš fállat nuppi kursaráiddu 2021-2023. Oahpporáidu lea bidjui johtui go Ruoŧa ráđđehus oinnii dárbbu nationála veahádatgielaid oahpaheddjiid vátnivuođa čoavdit. Ráđđehusa doaibmabidju galgá guhkit áiggi geahčastagas buktet eanet gelbbolaš oahpaheddjiide.
Oktavuođa dieđut
Jus háliidat eanet dieđuid ohccáma ja duođaštusaid birra, de váldde oktavuođa Sámi allaskuvlla oahppahálddahusain.
- Sámi allaskuvlla oahppo- ja dutkanhálddahusas, tlf. +47 78 44 84 00, e-poastta oahppohalddahus@samas.no
Jus háliidat eanet dieđuid oahpu sisdoalu ja čađaheami birra, válde oktavuođa Sámi allaskuvlla fágabargiin.
![]() |
Prošeaktajođiheddji Govven: Ánne Kátjá Gaup/Johtti Productions |
![]() |
Koordináhtori |