Sámi Instituhta 50 jagi ávvudeapmi
Skábmamánu 13.-14. beaivvi 2024 lágiduvvo ávvuseminára dan olis go lea 50 jagi áigi go Sámi Instituhtta ásahuvvui.
Lea nuvttá searvat seminárii. Mátkkoštan- ja idjadangolut eai máksojuvvo lágideaddji bealis. Dieđiheapmi lea dan dihte vai máhttit diŋgot borramuša oasseváldiide. Jus it hálit boradit, de sáhtát goitge čuovvut seminára vaikko it leat dieđihan ovdagihtii.
- Dieđihanáigemearri lea 5.11.2024.
Min olaha maid eboastta bokte: postmottak@samas.no / 78 44 84 00
Doalut eai rávdnjejuvvo. Ovdanbuktimat dulkojuvvojit eŋgelasgillii dahje davvisámegillii.
Prográmma Sámi Instituhta ávvuseminárii
Gaskavahkku 13.11.2024
09:00-09:30 Álggaheapmi, rektor Liv Inger Somby
9:30–10:00 Sámi instituhta duogáš ja historjá, ovddeš NSI-ovttadatjođiheaddji Alf Isak Keskitalo
10:00–10:30 Sámi instituhtta riektedutkan, PhD Nils Johan Päiviö
10:30-11:00 Boddu. Gáffe ja šattut
11:00–11:30 Sámi instituhtta servodatdutkan, ovdalaš direktevra ja dál professor emeritus Johan Klemet Kalstad
11:30–12:00 Sámi instituhtta gielladuktan, professor emeritus Nils Øivind Helander
12:00-13:00 Boddu. Boradeapmi
13:00-13:30 Sámi instituhta sámi dutkan, doseanta emerita Asta Mitkijá Balto
13:30–13:45 Sámi instituhta ruhtadeapmi, Davviriikkaid ministtarráđi generálačálli Karen Ellemann
13:45-14:15 Dutkandárbbuid birra, Sámiráđi Rune Fjellheim
14:15-14:45 Boddu. Gáffe ja gáhkku
14:45-15:45 Ságastallan
19:00 Ávvumállásat Sámi allaskuvlla kantiinnas
Duorasdat 14.11.2024
09:00-09:05 Álggaheapmi luđiin, Sárá Gáren Ánne Nilut juoigá
0905-0915 Dearvvuođat Sámedikkis, Sámediggeráđi Maren Benedicte Nystad Storslett
09:15–09:30 Ubmi universitehta Várdduo jođiheaddji, professor Christina Storm Mienna
09:30–09:45 UiT Norgga árktalaš universitehta professor Else Grete Broderstad
09:45–10:00 Oulu universitehta Giellas-instituhta sámekultuvrra oahpaheaddji Reetta Tornensis
10:00-10:30 Boddu. Gáffe ja šattut
10:30–11:00 Sámi allaskuvlla dálá ja boahtteáiggi gielladutkan, professor Annika Pasanen
11:00–11:30 Sámi allaskuvlla dála ja boahtteáiggi servodatdutkan, professor Nils Oskal
11:30-12:30 Boddu. Boradeapmi
12:30–13:00 Sámi allaskuvlla dálá ja boahtteáiggi duodjedutkan, professor Gunvor Guttorm
13:00–13:30 "Várppiid čázevuole duovdagat", doavttergrádastudeanta Mikkel Rasmus Logje
13:30–14:00 "Mii massit dáid eatnamiid nuppádassii. Sisabahkkemiid váikkuhusat boazosápmelaččaid birgejupmái", doavttergrádastudeanta Anni-Helena Ruotsala
14:00-14:30 Boddu. Gáffe ja gáhkku
14:30–15:00 "Dáiddalaš duodjedutkan", DrArts Maarit Magga
15:00 Loahpaheapmi
Fuomáš! Allaskuvlla girjerádjosis lea vejolaš oaidnit Dieđut-ráiddu čohkkejuvvon ovtta sadjái 1974-2024.
Lea 50 jagi áigi go Sámi Instituhta ásahuvvui Guovdageidnui
Sámi Instituhtta šattai oassin Sámi allaskuvlii 2005:s. Sámi allaskuvla lágida dál seminára ávvudan dihte Sámi Instituhta 50 jagi guhkes historjjá. Seminára bistá guokte beaivvi ja lea guđa oassái juhkkojuvvon.
- Vuosttaš oassi lea geahčastat Sámi Instituhta historjái ja dutkamii mii Instituhtas dahkkui, ja dasa makkár mearkkašupmi sámegielas lea sámi dutkamii oppalaččat.
- Nuppi oasis bovdejuvvojit Sámi politihkalaš ásahusat – Sámiráđđi ja sámedikkit muitalit makkár dutkandárbbuid sii oidnet Sámis.
- Dasto bovdejuvvojit Davviriikkaid ministtarráđđi ja Norgga Máhttodepartemeanta geat leat fásta sámi dutkama ruhtadeaddjit, muitalit makkárin oidnet iežaset mearkkašumi sámi dutkama ektui ja mo sámi dutkama ruhtadeami sáhtášii buoridit.
Nubbe beaivi:
- Njealját oasis bivdit dálá sámi dutkanásahusaid muitalit dutkama stáhtusa ja boahtteáiggi áigumušaid birra iežaset ásahusain.
- Viđát oasis ovdanbuktá Sámi allaskuvla iežas dálá dutkanstáhtusa ja boahtteáiggi dutkanáigumušaid.
- Loahpas nuorra dutkit geat leat bargame doavttergrádain dahje leat aitto geargan, čájehit makkár sámi dutkan dán áigge dahkko. Sin dutkamušat leat dasto joatkkan dasa maid Sámi Instituhta álggahii.
