Sámi allaskuvlla sámegiela ja sámi girjjálašvuođa doavttirgrádaprográmma jođiheaddji Torkel Rasmussen ja sámi sosiolingvistihka professor Annika Pasanen lágideaba čállinretrihta Sámi allaskuvlla doavttirgrádastudeanttaide. Sii leat čoahkkanan Rivdula Vasatokka leairaguovddážii, mii lea veaháš olggobealde Anára márkana. Doppe sii leat leamaš mánnodaga 28.10.24 rájes ja galget leat gitta bearjadahkii 1.11.24. Čállinretrihta ulbmilin lea ovttas čohkkát ja čállit, ja dainna lágiin beaktilit ovdánit doavttirgrádaprošeavttaiguin. Retrihttii leat searvan doavttirgrádastudeanttat Trond Are Anti (semantihkka), Sini Rasmus (sosiolingvistihkka), Mikkel Rasmus Logje (nammadutkan), Helena Omma (semantihkka), Mai-Britt Utsi (girjjálašvuohta), Saia Stueng (girjjálašvuohta), Magreta Sara (sosiolingvistihkka) ja Annukka Hirvasvuopio (girjjálašvuohta).

Govven Annika Pasanen