Search

Diehtosiiddas čájehuvvojit guokte filmma “Eadni, juoiggastivččet go?” ja “Mii”. Filmmaid lea ráhkadan Sámi allaskuvlla studeanta Máret Inger Aslaksdatter Anti. Dat lea oassin Dutkiid eahkedis mii lágiduvvo Alfreds Kroas maŋŋel filbmačájáhusa, masa Máret Inger maid searvá. Sisabeassan filbmačájáhussii Diehtosiiddas lea nuvttá.

Sámi girječállit muitalit ilolaš ja hástaleaddji proseassaid birra ja lohket divttaid ja teakstabihtážiid. Semináras leat maiddái luohteságastallamat ja juoigan. Luođit mat bohtet go juoigit gávnnadit ja ožžot juoigansaji. Čállima ja juoigama rikkis gáldun lea giella, giella mainna mi gulahallat sihke čálalaččat ja njálmmálaččat.